اکشرا نے اپنی تاریخی اننگز کے دوران 55 چوکے اور 8 چھکے لگائے

بھاگلپور، 18 جون (ہ س)۔ بہار کی نوجوان بلے باز اکشرا گپتا نے خواتین کی ڈومیسٹک کرکٹ میں ایک نیا ریکارڈ قائم کیا ہے۔ اس نے جمعرات کو بھاگلپور کے سنڈیس کمپاونڈ گراونڈ میں شروع ہوئے بی سی اے خواتین کے انڈر 19 ون ڈے ٹرافی ٹورنامنٹ میں ناقابل شکست 306 رن بنائے۔

اکشرا نے اپنی تاریخی اننگز کے دوران 55 چوکے اور آٹھ چھکے لگائے۔ اس نے یہ رن صرف 126 گیندوں میں 242.86 کے متاثر کن اسٹرائیک ریٹ سے بنائے اور تقریباً 233 منٹ میدان میں گزارے۔ اس کی اننگز کی ایک خاص بات اس کا دھماکہ خیز آغاز تھا۔ اکشرا نے شاندار بلے بازی کا مظاہرہ کرتے ہوئے 16 گیندوں میں نصف سنچری اور پھر 34 گیندوں میں اپنی سنچری مکمل کی۔

بہار کرکٹ ایسوسی ایشن (بی سی اے) کے صدر ہرش وردھن نے اکشرا کو ان کی کامیابی پر مبارکباد دی۔ ایک بیان میں انہوں نے کہا کہ بہار کی خواتین کرکٹرز اپنی کارکردگی سے ریاست کا نام روشن کر رہی ہیں۔ انہوں نے مزید کہا کہ بی سی اے کھلاڑیوں کو بہتر مواقع اور پلیٹ فارم فراہم کرنے کے لیے مسلسل کوشاں ہے اور اس طرح کی اننگز نوجوان کرکٹرز کے لیے تحریک کا کام کرتی ہے۔

بہار کرکٹ ایسوسی ایشن کے سکریٹری ضیا العارفین نے بھی مبارکباد پیش کرتے ہوئے کہا کہ بی سی اے خواتین کی انڈر 19 ون ڈے ٹرافی کے آغاز میں ہی اس طرح کے ٹیلنٹ کا ابھرنا بہار میں کرکٹ کے لیے ایک بہت ہی مثبت علامت ہے۔ انہوں نے اکشرا کے روشن مستقبل کی خواہش کی۔

اکشرا گپتا کی یہ اننگز اب خواتین کی ڈومیسٹک کرکٹ کی یادگار اننگز میں سے ایک بن گئی ہے اور اس نے بی سی اے خواتین کرکٹ میں ایک نیا ریکارڈ قائم کر دیا ہے۔

اس سے قبل، خواتین کی ڈومیسٹک کرکٹ میں سب سے زیادہ انفرادی اسکور ممبئی کی ایرا گپتا کے پاس تھا، جنہوں نے گھریلو ریاستی سطح کے میچ میں ناقابل شکست 346 رن بنائے تھے۔ ان کی اننگز میں 42 چوکے اور 16 چھکے شامل تھے۔ اکشرا گپتا کے ناقابل شکست 306 اور ایرا گپتا کے ناقابل شکست 346 رن اب خواتین کی ڈومیسٹک کرکٹ میں سب سے زیادہ انفرادی اسکور میں شامل ہو گئے ہیں۔

---------------

ہندوستان سماچار / عبدالسلام صدیقی