عالمی باکسنگ کپ کے کوارٹر فائنل میں پہنچیں ہندوستانی مکے باز میناکشی ہڈا

گوئی یانگ، 18 جون (ہ س)۔ ہندوستانی مکے باز میناکشی ہڈا نے چین کے گوئی یانگ میں منعقدہ عالمی باکسنگ کپ (مرحلہ 2) میں شاندار کارکردگی کا مظاہرہ کرتے ہوئے اپنے ویٹ کیٹیگری کے کوارٹر فائنل میں جگہ بنا لی ہے۔ خواتین کے 51 کلوگرام زمرے کے رانڈ آف-16 مقابلے میں میناکشی نے پولینڈ کی نتالیہ کچیوسکا کو یکطرفہ مقابلے میں 0-5 سے شکست دی۔ 48 کلوگرام زمرے کی موجودہ عالمی چیمپئن اور ٹاپ سیڈ مکے باز میناکشی نے اس سیزن میں 51 کلوگرام زمرے میں قدم رکھا ہے۔

تاہم، مردوں کے 65 کلوگرام زمرے میں ہندوستان کو مایوسی کا سامنا کرنا پڑا۔ پری کوارٹر فائنل میں ہندوستانی مکے باز اویناش جموال کو کرغزستان کے مرزوخد امام نظروف سے 0-5 سے شکست کا سامنا کرنا پڑا، جس کے ساتھ ہی ان کا سفر ختم ہو گیا۔ ٹورنامنٹ میں ہندوستان کے پانچ مکے باز کوارٹر فائنل میں پہنچ چکے ہیں۔ ان میں نکھل (55 کلوگرام)، دیپک (70 کلوگرام)، میناکشی (51 کلوگرام)، پراچی (57 کلوگرام) اور سنیہ (65 کلوگرام) شامل ہیں۔ وہیں، جیوتی (48 کلوگرام) اور جگنو (85 کلوگرام) سیمی فائنل میں پہنچ کر ہندوستان کے لیے تمغہ پکا کر چکی ہیں۔

ٹورنامنٹ کے پانچویں دن جمعہ کو ہندوستان کے چار مکے باز کوارٹر فائنل مقابلوں میں چیلنج پیش کریں گے۔ خواتین کے 51 کلوگرام زمرے میں میناکشی کا سامنا قازقستان کی الوا بالکی بیکووا سے ہوگا۔ اس کے علاوہ 65 کلوگرام زمرے میں اسنیہ کی ٹکر پولینڈ کی کنگا کرووکا سے ہوگی، جبکہ 57 کلوگرام زمرے میں پراچی کا مقابلہ چینی تائپے کی شیہ یی وو سے ہوگا۔ مردوں کے 55 کلوگرام زمرے میں نکھل کا سامنا آذربائیجان کے امین ممد زادہ سے ہوگا۔

ہندوستھان سماچار

--------------

ہندوستان سماچار / انظر حسن