پچیس ہزار کا انعامی اور ٹاپ-10 مجرم منے سنگھ ایس ٹی ایف کے شکنجے میں

سیوان، 13 جون (ہ س)۔ سیوان پولیس کو بڑی کامیابی ملی ہے۔ ضلع کے ٹاپ-10 مجرموں کی فہرست میں شامل 25 ہزار روپے کے انعامی مجرم منے سنگھ کو ضلع پولیس، ایس ٹی ایف اور ضلع انٹیلیجنس یونٹ کی مشترکہ ٹیم نے گرفتار کر لیا ہے۔ اس کی گرفتاری کو پولیس مجرموں کے خلاف چلائی جا رہی مہم کی بڑی کامیابی مان رہی ہے۔

پولیس سپرنٹنڈنٹ کی ہدایت پر فرار اور مطلوب مجرموں کی گرفتاری کے لیے چلائی جا رہی خصوصی مہم کے تحت 12 جون کو خفیہ اطلاع کی بنیاد پر کارروائی کی گئی۔ چھاپہ ماری کے دوران داروندہ تھانے کے رام گڑھا گاوں کے رہنے والے منے سنگھ کو پکڑ لیا گیا۔ وہ گوریا کوٹھی تھانہ کیس نمبر 24/317 میں مطلوب تھا اور طویل وقت سے پولیس کی گرفت سے باہر چل رہا تھا۔

پولیس ریکارڈ کے مطابق، منے سنگھ کی مجرمانہ تاریخ کافی طویل ہے۔ اس کے خلاف لوٹ، ڈکیتی، بھتہ خوری، قاتلانہ حملہ، آرمز ایکٹ، این ڈی پی ایس ایکٹ اور درج فہرست ذات و درج فہرست قبائل (مظالم کی روک تھام) ایکٹ سمیت کئی سنگین دفعات کے تحت آٹھ سے زیادہ کیسز درج ہیں۔ وہ داروندہ، گوریا کوٹھی، مہاراج گنج اور جی بی نگر تھانوں میں درج مختلف مقدمات کا ملزم رہا ہے۔

پولیس ذرائع کے مطابق، ملزم کی سرگرمیوں پر طویل وقت سے نظر رکھی جا رہی تھی۔ درست اطلاع ملنے کے بعد ضلع انٹیلیجنس یونٹ، ایس ٹی ایف اور گوریا کوٹھی تھانہ پولیس نے مشترکہ حکمتِ عملی بنا کر اسے گرفتار کر لیا۔ گرفتاری کے بعد اس سے پوچھ گچھ کی گئی اور پھر عدالتی حراست میں بھیجنے کی کارروائی شروع کر دی گئی۔

سیوان پولیس نے کہا ہے کہ ضلع میں جرائم اور مجرموں کے خلاف مہم لگاتار جاری رہے گی اور فرار مجرموں کو کسی بھی قیمت پر بخشا نہیں جائے گا۔ اس کارروائی میں ضلع انٹیلیجنس یونٹ، ایس ٹی ایف ٹیم، گوریا کوٹھی تھانہ انچارج اور تھانے کے دیگر پولیس اہلکاروں کا اہم کردار رہا۔

ہندوستھان سماچار

---------------

ہندوستان سماچار / انظر حسن