بی ایس ایف کی فائرنگ میں بنگلہ دیشی اسمگلر ہلاک، تریپورہ کی لتیا پورہ سرحد پر کشیدگی

کیلاشہر، 13 جون (ہ س)۔ ہندوستان-بنگلہ دیش سرحد پر ایک بنگلہ دیشی اسمگلر مارا گیا۔ انکوٹی ضلع کے کیلاشہر سب ڈویژن کے ایرانی پولیس اسٹیشن کے تحت لتیا پورہ سرحد پر اسمگلنگ روکنے کی کوشش میں بارڈر سیکورٹی فورس (بی ایس ایف) کی فائرنگ میں بنگلہ دیشی اسمگلر کی موت ہو گئی۔ جمعہ کی دیر شام بین الاقوامی سرحد کے پاس پیش آئے اس واقعے سے سرحد پار سنسنی پھیل گئی ہے۔

بی ایس ایف ذرائع کے مطابق، سیکورٹی فورسز نے جمعہ کی شام 5.45 بجے سے 6.15 بجے کے درمیان لتیا پورہ بی اے او پی ایریا کے بارڈر پلر نمبر 1852/14- ایس سے ملحقہ علاقے میں مشتبہ سرگرمیاں دیکھیں۔ الزام ہے کہ 10 سے 12 لوگوں کا بنگلہ دیشی اسمگلر گروہ بڑی مقدار میں برمیز (میانمار) سگریٹ لے کر بین الاقوامی سرحد پار کرنے کی کوشش کر رہا تھا۔

ڈیوٹی پر موجود بی ایس ایف جوانوں نے پہلے اسمگلروں کو رکنے کی ہدایت دی۔ بی ایس ایف نے دعویٰ کیا کہ کئی بار وارننگ کے باوجود انہوں نے وارننگ کو نظر انداز کیا اور تیزی سے آگے بڑھتے رہے۔ حالات قابو سے باہر ہوتے دیکھ کر جوانوں نے دو راونڈ فائرنگ کی۔ گولی لگنے سے ایک بنگلہ دیشی ملزم کی موقع پر ہی موت ہو گئی جس کی شناخت ماجد علی (30) کے طور پر ہوئی ہے۔ اس کا گھر بنگلہ دیش کے مولوی بازار ضلع کے کلورا پولیس اسٹیشن کے نشچنت پور گاوں میں ہے۔ اس کے والد کا نام عجیب علی ہے۔

واقعے کے بعد بی ایس ایف نے سرحدی علاقے میں بڑی مہم شروع کی ہے۔ ممکنہ تناو اور دراندازی کے خدشے کے پیشِ نظر پورے علاقے میں سیکورٹی مزید بڑھا دی گئی ہے۔ سرحد پر نگرانی سخت کر دی گئی ہے۔ واقعے کو لے کر مقامی سطح پر طرح طرح کے تبصرے شروع ہو گئے ہیں۔ سرحدی علاقے میں برمیز سگریٹ سمیت کئی طرح کے پروڈکٹس کی اسمگلنگ کو لے کر طویل عرصے سے تشویش تھی۔ سرحد پر رہنے والوں کا ماننا ہے کہ آج کے واقعے نے اسمگلنگ گینگ کے سرگرم ہونے کی بات پھر سے سامنے لا دی ہے۔

تاہم، اس واقعے کے بارے میں ابھی تک بارڈر گارڈ بنگلہ دیش (بی جی بی) کی طرف سے کوئی سرکاری جواب نہیں آیا ہے۔ پتہ چلا ہے کہ بی ایس ایف اور متعلقہ انتظامی حکام اس واقعے پر پوری رپورٹ تیار کر رہے ہیں۔ سرحد پر اسمگلنگ روکنے کے لیے بی ایس ایف کی اس سخت کارروائی نے ہندوستان-بنگلہ دیش بارڈر سیکورٹی پر ایک نئی بحث چھیڑ دی ہے۔

ہندوستھان سماچار

---------------

ہندوستان سماچار / انظر حسن