جورہاٹ ،13 جون (ہ س)۔ ہندوستانی فضائیہ (آئی اے ایف) کا اے این -32 ٹرانسپورٹ طیارہ جمعہ کو آسام کے جورہاٹ میں روریا ایئر فورس اسٹیشن پر گر کر تباہ ہوگیا۔ ابتدائی معلومات کے مطابق طیارہ لینڈنگ کے دوران گر کر تباہ ہوا اور اس میں آگ لگ گئی۔

عینی شاہدین نے حادثے کے بعد ایئربیس کے علاقے میں بلند شعلوں اور گاڑھا دھواں دیکھنے کی اطلاع دی۔ بتایا جا رہا ہے کہ گر کر تباہ ہونے والا طیارہ فضائیہ کے 43ویں اسکواڈرن کا تھا اور معمول کے مطابق فوجی پرواز پر تھا۔ طیارے کا استعمال فوجی سامان اور رسد کی نقل و حمل کے لیے ہوتا ہے۔

ذرائع کے مطابق، طیارہ مقررہ رن وے پر بحفاظت لینڈ کرنے میں ناکام رہا اور ائیربیس کے ایک گھاس اور ناہموار علاقے میں اتر گیا۔ لینڈنگ کے دوران زوردار دھماکے کے بعد طیارے میں آگ لگ گئی اور وہ دو ٹکڑوں میں تقسیم ہو گیا۔

حادثے کے فوری بعد ،ایئربیس کی فائر بریگیڈ اور ایمرجنسی ریسکیو ٹیمیں جائے وقوعہ پر پہنچیں اور آگ پر قابو پالیا۔ انتظامیہ اور سیکورٹی اداروں نے بچاو اور راحت آپریشن شروع کر دیا ہے۔

ہندوستانی فضائیہ نے واقعہ کی تصدیق کرتے ہوئے کہا کہ اے این- 32 طیارہ جورہاٹ میں گر کر تباہ ہوا۔ فضائیہ نے کہا کہ معاملے کی جانچ شروع کر دی گئی اورمزید تفصیلات شیئر کی جائیں گی۔

اس وقت جہاز میں موجود عملے اور دیگر فوجی اہلکاروں کی حالت کے بارے میں کوئی سرکاری اطلاع جاری نہیں کی گئی ہے۔ حادثے کی وجوہات جاننے کے لیے تفصیلی تحقیقات شروع کر دی گئی ہیں۔

قابل ذکر ہے کہ جورہاٹ میں واقع روریا ایئر فورس اسٹیشن شمال مشرقی ہندوستان میں ہندوستانی فضائیہ کا ایک اہم فوجی اڈہ ہے، جو خطے میں فضائی کارروائیوں، فوجی رسد کی فراہمی اور اسٹریٹجک سرگرمیوں کے انعقاد میں اہم کردار ادا کرتا ہے۔

ہندوستھان سماچار

ہندوستان سماچار / محمد شہزاد