واشنگٹن،30مئی (ہ س)۔امریکی اخبار ’وال اسٹریٹ جرنل‘ کی ہفتے کے روز شائع رپورٹ کے مطابق، امریکہ نے آبنائے ہرمز میں بارودی سرنگوں کو ہٹانے کے لیے روبوٹوں کا استعمال کیا ہے۔ اخبار نے حکام کے حوالے سے بتایا ہے کہ کئی بحری جہاز ٹریکنگ آلات بند کرنے کے بعد آبنائے ہرمز عبور کرنے میں کامیاب رہے اور انہوں نے تصدیق کی کہ امریکی فوج نے آبنائے عبور کرنے والے جہازوں کے ساتھ رابطہ کاری قائم کی تھی۔

امریکی صدر ڈونلڈ ٹرمپ نے گذشتہ روز تصدیق کی تھی کہ وہ ایران کے ساتھ ایک ممکنہ معاہدے کے بارے میں حتمی فیصلہ کرنے کی تیاری کر رہے ہیں۔ اپنے پلیٹ فارم ٹروتھ سوشل پر ایک پوسٹ میں ٹرمپ نے اعلان کیا کہ ایران پر قائم بحری محاصرہ اب اٹھا لیا جائے گا۔ انہوں نے لکھا شان دار اور بے مثال بحری محاصرے کی وجہ سے آبنائے میں پھنسے ہوئے بحری جہاز، جسے ہم اب اٹھا رہے ہیں، اپنے وطن واپسی کا عمل شروع کر سکتے ہیں!۔دوسری جانب ٹرمپ کی پوسٹ کے مطابق ایران کو دونوں سمتوں میں بغیر کسی رکاوٹ کے بحری جہاز رانی کے لیے آبنائے ہرمز کو فوری طور پر، بغیر کسی راہ داری ٹیکس کے کھولنا ہو گا اور وہاں موجود باقی ماندہ تمام بحری بارودی سرنگوں کو ہٹانے پر کام کرنا ہو گا، جبکہ کئی بارودی سرنگوں کو جدید امریکی مائن سویپرز (بارودی سرنگیں صاف کرنے والے بحری جہازوں) کے ذریعے دھماکے سے اڑا کر پہلے ہی صاف کیا جا چکا ہے۔

برطانوی بحریہ نے بھی آبنائے ہرمز سے بارودی سرنگوں کی صفائی میں حصہ لینے کے لیے اپنی آمادگی کا اعلان کیا تھا۔برطانوی بحریہ نے اشارہ کیا کہ جیسے ہی واشنگٹن اور تہران کے درمیان امن معاہدہ طے پا جائے گا، سیکڑوں برطانوی ملاح اپنی ذمہ داریاں شروع کرنے کے لیے احکامات کے منتظر ہیں۔

ہندوستھان سماچار

ہندوستان سماچار / Mohammad Khan