کانگریس نے حادثے کا ذمہ دار وزیر سیاحت کو ٹھہرایا

بھوپال، 03 مئی (ہ س)۔

مدھیہ پردیش کے جبل پور کے برگی ڈیم میں ہوئے کروز حادثے میں 13 افراد کی موت کے بعد ریاست میں سیاسی ماحول گرما گیا ہے۔ اس واقعے کے لیے وزیر سیاحت دھرمیندر لودھی کو ذمہ دار ٹھہراتے ہوئے اتوار کو راجدھانی بھوپال میں یوتھ کانگریس کے کارکنوں نے احتجاجی مظاہرہ کیا اور علامتی شویاترا نکالی۔

بھوپال کے جواہر بال بھون سے شروع ہونے والی اس ریلی کو پولیس نے پرکاش ترن پشکر کے پاس بیریکیڈ لگا کر روکنے کی کوشش کی۔ تاہم، کارکنان آگے بڑھنے پر بضد رہے اور اس دوران پولیس کے ساتھ دھکا مکی کی صورتحال بن گئی۔ یوتھ کانگریس کے ضلع صدر امت کھتری اور ریاستی نائب صدر ابھشیک پرمار کی قیادت میں نکالے گئے اس احتجاج میں علامتی طور پر 11 لاشوں کی یاترا نکالی گئی۔ مظاہرے کے دوران کارکنوں نے ان ارتھیوں کو بیریکیڈ کی طرف پھینک کر اپنے غم و غصے کا اظہار کیا۔ وہیں، صورتحال کو قابو میں کرنے کے لیے پولیس نے پہلے سمجھانے کی کوشش کی، لیکن جب مظاہرین نہیں مانے تو ہلکی طاقت کا استعمال کر کے انہیں منتشر کر دیا۔

قابل ذکر ہے کہ گزشتہ جمعرات (30 اپریل) کی شام تیز آندھی اور طوفان کی وجہ سے ایم پی ٹورزم کا سیاحوں سے بھرا کروز برگی ڈیم میں ڈوب گیا تھا۔ کروز میں تقریباً 47 سیاح سوار تھے۔ حادثے کی اطلاع ملتے ہی پولیس اور ضلع انتظامیہ کی ٹیم موقع پر پہنچی اور امدادی و بچاو مہم شروع کی۔ این ڈی آر ایف اور ایس ڈی آر ایف کی مدد سے ابتدائی دو دنوں تک جاری رہنے والی امدادی و بچاو مہم کے دوران 29 افراد کو بچا لیا گیا تھا، جبکہ حادثے میں 13 افراد کی موت ہو گئی۔

ہندوستھان سماچار

---------------

ہندوستان سماچار / انظر حسن