کھیل۔کود کے وزیر مانڈویا نے مدیکیری میں ابھرتے ہوئے ہاکی کھلاڑیوں سے ملاقات کی، انہیں مستقبل کے اولمپین قرار دیا

مدیکیری، 03 مئی (ہ س)۔ مرکزی وزیر برائے کھیل۔کود منسکھ مانڈویا نے کرناٹک کے مدیکیری میں واقع اسپورٹس اتھارٹی آف انڈیا (سائی) کے تربیتی مرکز کا دورہ کیا اور نوجوان ہاکی کھلاڑیوں سے ملاقات کی۔ اس دوران انہوں نے ملک کے مختلف حصوں سے صلاحیتوں کو پہچاننے اور انہیں نکھارنے پر زور دیتے ہوئے، ہندوستان کو کھیل کی سپر پاور بنانے کی سمت میں اسے اہم قرار دیا۔

مانڈویا نے خاص طور پر کوڈوا برادری کی خاتون ہاکی کھلاڑیوں سے بات چیت کی اور ان کی صلاحیتوں کی تعریف کی۔ انہوں نے کہا کہ ضلع کوڈگو ہندوستانی ہاکی کی مضبوط بنیاد رکھنے والے خطوں میں سے ایک رہا ہے۔ اس برادری سے کئی کھلاڑی بین الاقوامی سطح پر ملک کی نمائندگی کر چکے ہیں اور اولمپکس میں بھی حصہ لے چکے ہیں۔

وزیر کھیل نے کہا کہ ملک میں کھیلوں کے لیے ایک وسیع اور مضبوط ڈھانچہ تیار کیا جا رہا ہے، جس میں نچلی سطح سے صلاحیتوں کو آگے لانا ترجیح ہے۔ انہوں نے یقین ظاہر کیا کہ ہندوستان کے پاس ٹیلنٹ کی کوئی کمی نہیں ہے اور صحیح سمت میں کوششوں سے ملک عالمی سطح پر کھیلوں میں اپنی مضبوط شناخت بنا سکتا ہے۔

انہوں نے کہا کہ حکومت کھیل کے ایکو سسٹم کو مضبوط کرنے کے لیے ہر ممکن قدم اٹھا رہی ہے۔ کھیلوں کے بڑے مقابلوں کی میزبانی بھی اسی سمت میں ایک اہم پہل ہے۔ مانڈویا نے امید ظاہر کی کہ سال 2030 میں ہونے والے کامن ویلتھ گیمز میں ہندوستانی مرد اور خواتین ہاکی ٹیمیں شاندار کارکردگی کا مظاہرہ کریں گی۔

مدیکیری میں واقع سائی تربیتی مرکز جدید سہولیات سے لیس ہے اور یہاں نوجوان کھلاڑیوں کو اعلیٰ سطح کی تربیت دی جاتی ہے۔ یہ مرکز پورے ملک میں مختلف نیشنل سینٹرز آف ایکسیلنس کے لیے ہنر کو تیار کرنے میں اہم کردار ادا کرتا ہے۔ مانڈویا نے کھلاڑیوں کی حوصلہ افزائی کرتے ہوئے کہا کہ یہ نوجوان کھلاڑی مستقبل میں ہندوستان کا نام روشن کر سکتے ہیں اور بین الاقوامی پلیٹ فارم پر ملک کو نئی بلندیوں تک لے جانے کی صلاحیت رکھتے ہیں۔

ہندوستھان سماچار

---------------

ہندوستان سماچار / انظر حسن