نئی دہلی، 22 مئی (ہ س)۔

کانگریس کے جنرل سکریٹری (مواصلات) جے رام رمیش نے نیشنل اسپورٹس ڈیولپمنٹ فنڈ (این ایس ڈی ایف) کے مبینہ غلط استعمال کو لے کر حکومت اور نوکرشاہوں پر سخت نکتہ چینی کی ہے۔ انہوں نے الزام لگایا کہ ملک کے سرکردہ کھلاڑیوں کی مدد کرنے کے بجائے فنڈز کا استعمال آئی اے ایس افسران کے لیے پرتعیش بنگلے اور فلاحی انجمنوں میں اسپورٹس کمپلیکس بنانے میں کیا گیا۔

جے رام رمیش نے جمعہ کو ایکس پر لکھا کہ این ایس ڈی ایف بنیادی طور پر ٹارگٹ اولمپک پوڈیم اسکیم (ٹی او پی ایس) کو مالی مدد فراہم کرتا ہے، جو کہ اولمپک سطح کے ایلیٹ ایتھلیٹس کی مدد کے لیے ایک اہم سرکاری اسکیم ہے۔ مالیاتی اعداد و شمار کا حوالہ دیتے ہوئے، انہوں نے کہا کہ این ایس ڈی ایف کو عطیات مالی سال 2023-24 میں 85.26 کروڑ سے کم ہو کر مالی سال 2025-26 میں صرف 37.02 کروڑ رہ گئے ہیں۔ فنڈ کا انتظام مرکزی وزیر کھیل کی زیر صدارت ایک کونسل کرتا ہے۔

سکریٹری جنرل نے کہا کہ پارلیمانی قائمہ کمیٹی برائے تعلیم، خواتین، بچوں، نوجوانوں اور کھیلوں نے اگست 2025 میں یہ مسئلہ اٹھایا تھا کہ این ایس ڈی ایف کے فنڈز کا استعمال آئی اے ایس افسران اور فلاحی انجمنوں کی رہائش گاہوں میں اسپورٹس کمپلیکس بنانے کے لیے کیا جا رہا ہے۔ اس کے بعد، ایک اخباری رپورٹ میں اس مالی خرد برد کی تفصیل دی گئی۔ انہوں نے اس بات پر افسوس کا اظہار کیا کہ اولمپک میڈل جیتنے والے ایتھلیٹس کی ترقی کے لیے جو فنڈز استعمال کیے جانے تھے وہ افسران کے پرتعیش بنگلوں کی تعمیر کے لیے استعمال کیے جا رہے تھے۔ انہوں نے کہا کہ ایسے وقت میں جب پورا ملک مستقبل میں اولمپکس کی میزبانی کا منتظر ہے، فنڈز کا اس طرح کا غلط استعمال ہمارے کھلاڑیوں کے حوصلے پست کرنے والا ہے۔جے رام نے الزام لگایا کہ حکمراں جماعت نے پارلیمانی کمیٹی کی رپورٹ کو صرف اس لیے مسترد کیا اور نظر انداز کیا کہ کمیٹی میں اپوزیشن کے ارکان شامل تھے۔ انہوں نے کہا کہ اب یہ وزارت کھیل کی قیادت پر منحصر ہے کہ وہ آئی اے ایس لابی کے خلاف اصلاحی کارروائی کرے یا اس حساس معاملے کو سیاسی رنگ دے۔

ہندوستھان سماچار

ہندوستان سماچار / Mohammad Khan