کولکاتہ، 21 مئی (ہ س):۔

کلکتہ ہائی کورٹ نے جمعرات کو کولکاتہ میں بقرعید سے پہلے گائے اور بھینس کے ذبیحہ پر ریاستی حکومت کی پابندیوں کے بارے میں دائر مفاد عامہ کی عرضیوں کی سماعت کی۔

سماعت کے دوران، درخواست گزاروں کی نمائندگی کرتے ہوئے سینئر وکیل وکاس بھٹاچاریہ نے دلیل دی کہ اگر کسی قانون کو طویل عرصے تک مو¿ثر طریقے سے نافذ نہیں کیا جاتا ہے، تو اس کی قانونی حیثیت کمزور ہو جاتی ہے۔ عدالت نے ریمارکس دیئے کہ اگر قانون موثر نہ ہوتا تو اتنی بڑی تعداد میں درخواستیں دائر نہ ہوتیں۔

درخواست گزار رام کرشن پال نے گائے کے ذبیحہ پر مکمل پابندی لگانے کا مطالبہ کیا۔ انہوں نے کہا کہ بقرعید کے نام پر معصوم جانور مارے جاتے ہیں۔ ان کے مطابق، ہندو مذہبی روایت میں بلی کا مطلب جانوروں کو ذبح کرنا نہیں ہے، بلکہ انسانوں کے اندر حیوانی جبلتوں کو دبانا ہے۔

دوسری درخواست میں محمد ظفر یاسنی نے دلائل دیتے ہوئے کہا کہ حکومت عیدالاضحی کے دوران قربانی کے حوالے سے واضح رہنما اصول جاری کرے اور قانونی مذبح خانوں کی فہرست منظر عام پر لائی جائے۔ انہوں نے کہا کہ ان پڑھ اور نیم خواندہ لوگوں کی ایک بڑی تعداد اس عمل میں ملوث ہے جو قانون سے ناواقف ہے۔ انہوں نے سوال کیا کہ اتنے کم وقت میں نئے نظام کو مو¿ثر طریقے سے نافذ کرنا کیسے ممکن ہوگا، جب کہ بقرعید 28 مئی کو آتی ہے۔ عدالت کو بتایا گیا کہ ریاستی حکومت کو تمام اسٹیک ہولڈرز سے مشاورت کے بعد ہی ایسا فیصلہ کرنا چاہیے تھا۔

محمد شکیل وارثی کی نمائندگی کرتے ہوئے سویہساچی چٹوپادھیائے نے ریاستی حکومت کے نوٹیفکیشن کو منسوخ کرنے کا مطالبہ کیا۔ انہوں نے کہا کہ 1950 کے لائیو سٹاک ایکٹ کے تحت فٹنس سرٹیفیکیشن لازمی ہے، لیکن ریاست کے پاس مناسب طریقہ کار کا فقدان ہے، جس سے عملی طور پر مشکلات پیدا ہو رہی ہیں۔

دریں اثنا، جمعیة علماء کے ایڈوکیٹ وکاس رنجن بھٹاچاریہ نے دلیل دی کہ بدلتے ہوئے حالات کی روشنی میں قانون کی دوبارہ تشریح کی جانی چاہیے۔ انہوں نے دعویٰ کیا کہ مغربی بنگال میں مویشیوں کی تعداد اور دودھ کی پیداوار میں مسلسل اضافہ ہو رہا ہے، جبکہ اتر پردیش مکمل پابندی کے باوجود کمی کا سامنا کر رہا ہے۔

انہوں نے دلیل دی کہ یہ قانون صرف ان شہری علاقوں پر لاگو ہو سکتا ہے جو 1952 میں میونسپل علاقے تھے۔

کولکاتہ اور کلمپونگ سے باہر قانون کے نفاذ پر سوال اٹھاتے ہوئے انہوں نے کہا کہ پنچایتی علاقوں کو کبھی باضابطہ طور پر مطلع نہیں کیا گیا۔ مزید برآں، سائنسی جانچ کے بغیر جانور کی عمر کا تعین کرنا عملی نہیں ہے۔

سماعت کے دوران عدالت نے یہ بھی نوٹ کیا کہ اس معاملے پر ہر سال نوٹیفکیشن جاری ہوتے رہے ہیں، اس لیے اسے مکمل طور پر غیر موثر کہنا مناسب نہیں ہوگا۔ اب کیس کی مزید سماعت ہوگی۔

قابل ذکر بات یہ ہے کہ ریاست میں اقتدار میں آنے کے بعد، بھارتیہ جنتا پارٹی (بی جے پی) حکومت نے 1950 کے لائیوسٹاک ایکٹ کی کچھ دفعات کو سختی سے نافذ کیا ہے۔ نئی ہدایات کے مطابق انتظامی اجازت کے بغیر مویشی ذبح نہیں کیے جا سکتے اور 14 سال سے کم عمر کے جانوروں کو ذبح کرنے پر پابندی ہے۔ مزید برآں، گوشت کی فروخت کے لیے مقامی ادارے یا محکمہ حیوانات سے تحریری اجازت درکار ہے۔ اپوزیشن جماعتوں کا دعویٰ ہے کہ ان قوانین نے بقرعید کے دوران قربانی کے حوالے سے غیر یقینی صورتحال پیدا کردی ہے۔

ہندوستھان سماچار

ہندوستان سماچار / عطاءاللہ