کاٹھمنڈو، 21 مئی (ہ س) ۔

نیپال کی حکمران راشٹریہ سوتنتر پارٹی کے رکن پارلیمنٹ ڈاکٹر امریش کمار سنگھ نے اپنی ہی حکومت کے خلاف محاذ کھول دیاہے۔ 5 مارچ کے انتخابات کے بعد حکومت کی تشکیل کے ڈیڑھ ماہ کے اندر سنگھ نے وزیر اعظم بالیندر شاہ کی قیادت کے انداز پر سوال اٹھائے ہیں۔ انہوں نے دو دن قبل ایوان نمائندگان میں وزیر خزانہ سوارنم واگلے کے کام کرنے کے انداز پر بھی سوال اٹھایا۔

ایم پی امریش سنگھ نے آج صحافیوں کو بتایا کہ نیپال پاکستان کی طرز کی جمہوریت کی طرف بڑھ رہا ہے۔ وزیر اعظم بالیندر شاہ کے پارلیمنٹ کو نظرانداز کرنے کے انداز کی طرف اشارہ کرتے ہوئے انہوں نے پاکستان کے جمہوری ماڈل کو مثال کے طور پر پیش کیا۔ انہوں نے کہا، جس طرح سے تاجروں کو قانونی طریقہ کار مکمل کیے بغیر حراست میں لیا جاتا ہے اور پھر اگلے دن رہا کیا جاتا ہے، اس سے نیپال کو ایک ٹیرر اسٹیٹ کے طور پر جانا جانے لگاہے۔

سنگھ نے کہا کہ نیپال کو ڈیموکریٹک اسٹیٹ بننا چاہیے، نہ کہ پولیس اسٹیٹ۔ انہوں نے مزید کہا کہ پاکستان میں جمہوریت نہ کبھی تھی، ہے اور نہ کبھی مستحکم ہوگی ،کیونکہ وہاں کی پارلیمنٹ کو کبھی مضبوط نہیں ہونے دیا گیا۔ انہوں نے یہ عندیہ بھی دیا کہ موجودہ حکومت اپنی مدت پوری نہیں کر سکے گی۔

---------------

ہندوستان سماچار / عبدالسلام صدیقی