شملہ، 21 مئی (ہ س)۔ ہماچل پردیش میں مئی کی گرمی اب میدانی علاقوں سے پہاڑوں تک پھیل چکی ہے۔ جمعرات کی صبح سے ہی ریاست کے بیشتر حصوں میں تیز دھوپ ہے جس کی وجہ سے نشیبی اور میدانی علاقوں کے لوگوں کے لیے گھروں سے باہر نکلنا مشکل ہو گیا ہے۔ دوپہر کے اوقات میں بازاروں اور سڑکوں پر نقل و حرکت بہت کم دکھائی دی۔ صورتحال ایسی ہے کہ روایتی طور پر ٹھنڈے سمجھے جانے والے پہاڑی مقامات جیسے شملہ، منالی اور کلپا میں دن اور رات دونوں میں گرمی محسوس ہونے لگی ہے۔ ان علاقوں میں آنے والے سیاح بھی اب گرمی کی شدت کو محسوس کر رہے ہیں۔

محکمہ موسمیات کے مطابق گزشتہ 24 گھنٹوں کے دوران اونا، دھرم شالہ، شملہ، سولن اور پالم پور میں شدید گرمی ریکارڈ کی گئی۔

محکمہ کے اعداد و شمار کے مطابق، بدھ کو اونا میں زیادہ سے زیادہ درجہ حرارت 44 ڈگری سیلسیس تک پہنچ گیا، جس سے یہ ریاست کا گرم ترین خطہ بن گیا۔ شملہ میں زیادہ سے زیادہ درجہ حرارت 30.5 ڈگری ریکارڈ کیا گیا جو کہ معمول سے تقریباً 5.5 ڈگری زیادہ ہے۔ اسی طرح دھرم شالہ میں 36.1 ڈگری، پالم پور میں 34 ڈگری اور سولن میں 36.5 ڈگری سیلسیس درجہ حرارت ریکارڈ کیا گیا۔ اس مسلسل بڑھتے ہوئے درجہ حرارت کے اثرات اب لوگوں کے روزمرہ کے معمولات پر نظر آنے لگے ہیں۔

شدید گرمی کے پیش نظر پاونٹا صاحب (ضلع سرمور) اور اونا میں انتظامیہ نے کئی اسکولوں کے اوقات میں تبدیلی کی ہے۔ ان علاقوں میں اسکول اب صبح سویرے کھل رہے ہیں تاکہ بچوں کو دوپہر کی تیز دھوپ اور گرمی کی لہروں سے بچایا جا سکے۔ لوگوں کو یہ بھی مشورہ دیا جا رہا ہے کہ وہ دوپہر کے اوقات میں گھروں سے باہر نکلنے سے گریز کریں۔

ریاست میں کم از کم درجہ حرارت بھی معمول کی سطح سے اوپر ہے۔ جمعرات کی صبح نیری میں سب سے زیادہ کم سے کم درجہ حرارت — 27.6 ڈگری سیلسیس — ریکارڈ کیا گا۔

بڑھتی ہوئی گرمی کے درمیان، محکمہ موسمیات نے اگلے تین دنوں تک راحت اور ممکنہ پریشانی کے امتزاج کی پیش گوئی کی ہے۔

محکمہ کے مطابق 21 مئی سے 23 مئی تک کئی علاقوں میں گرج چمک کے ساتھ بارش ہوسکتی ہے۔ جمعرات کے لیے بعض علاقوں کے لیے 30 سے 40 کلومیٹر فی گھنٹہ کی رفتار سے چلنے والی تیز ہواؤں، آسمانی بجلی گرنے اور ژالہ باری کے حوالے سے وارننگ جاری کی گئی ہے۔

جمعہ کو موسم مزید فعال رہنے کی توقع ہے، 40 سے 50 کلومیٹر فی گھنٹہ کی رفتار سے کئی علاقوں میں شدید طوفان آنے کا امکان ہے۔ اس دن کے لیے خاص طور پر ژالہ باری کے حوالے سے 'اورنج الرٹ' جاری کیا گیا ہے۔ گرج چمک اور تیز ہواؤں کا اثر مختلف علاقوں میں 23 مئی کو بھی برقرار رہ سکتا ہے۔ محکمہ موسمیات نے موسم میں ہونے والی ان تبدیلیوں کی وجہ مغربی ڈسٹربنس کی مسلسل سرگرمی کو قرار دیا ہے۔

ہندوستھان سماچار

---------------

ہندوستان سماچار / عبدالواحد