نئی دہلی، 21 مئی (ہ س)۔ بھارتیہ جنتا پارٹی (بی جے پی) نے وزیر اعظم نریندر مودی کے پانچ ممالک کے دورے کو ملک کے لیے ایک اہم اور اسٹریٹجک دورہ قرار دیتے ہوئے کہا کہ اس سے ہندوستان کی تجارت، سرمایہ کاری اور عالمی شراکت داری کو تقویت ملی ہے۔ بی جے پی کے سینئر لیڈر اور مرکزی وزیر پیوش گوئل نے جمعرات کو پارٹی ہیڈکوارٹر میں ایک پریس کانفرنس سے خطاب کرتے ہوئے کہا کہ وزیر اعظم مودی کے غیر ملکی دوروں سے ہندوستان کی تجارت، سرمایہ کاری اور عالمی شراکت داری کو تقویت ملی ہے۔ آج، ہندوستان ایک مضبوط پوزیشن سے دنیا کے ساتھ بات چیت کر رہا ہے اور بہت سے ممالک کے ساتھ اقتصادی تعلقات میں مسلسل بہتری آئی ہے۔ انہوں نے کہا کہ یہ بین الاقوامی دورہ صرف ایک سفارتی اور سیاسی مرحلہ نہیں تھا، بلکہ اس نے ہندوستان کے مستقبل کے لیے بڑے نتائج پیدا کیے ہیں۔ مودی اس سفر کے ذریعے ہندوستان کے ہر طبقے کے لیے کچھ نہ کچھ لے کر آئے۔ اگر ہم اس دورے کے نتائج کو دیکھیں تو متحدہ عرب امارات نے 75 سے 100 بلین ڈالر کی سرمایہ کاری کرنے کا عہد کیا ہے اور اس دورے میں تقریباً 45 ہزار کروڑ روپے یعنی تقریباً 5 بلین ڈالر کے وعدوں کی مکمل منظوری دی گئی اور وہ ہندوستان آنے کے لیے تیار ہو گئے ہیں۔ انہوں نے کہا کہ وزیر اعظم مودی کے حالیہ پانچ ممالک کے دورے کے دوران یو اے ای، نیدرلینڈ، سویڈن، ناروے اور اٹلی کے ساتھ تجارت، دفاع، توانائی اور ٹیکنالوجی سمیت کئی شعبوں میں تعاون میں اضافہ پر بات چیت کی گئی۔

اپوزیشن کے سوالوں کا جواب دیتے ہوئے گوئل نے کہا کہ جہاں پوری دنیا ہندوستان اور وزیر اعظم پر اعتماد کا اظہار کر رہی ہے، راہل گاندھی اپنے بیانات اور تقریروں میں مسلسل منفی سوچ کا مظاہرہ کر رہے ہیں۔ گوئل نے کہا، ہندوستان کے لوگ بار بار راہل گاندھی کو مسترد کر رہے ہیں۔ ان کی مایوسی، ان کی ذہنیت اور وہ وزیر اعظم کے خلاف جو نازیبا زبان استعمال کررہے ہیں، صاف نظر آ رہا ہے۔

کیا نکسل ازم کو ختم کرنا غداری ہے؟ یا کانگریس کے دور حکومت میں برسوں سے نکسل ازم کو پنپنے کی اجازت دینا غداری تھا؟ کانگریس اور گاندھی خاندان جس طرح دراندازوں کی حمایت کرتے ہیں وہ غداری ہے۔

انہوں نے کہا، کیا عالمی پلیٹ فارم پر ہندوستانی ترنگے کا احترام کرنا غداری ہے یا بیرون ملک ترنگے کی توہین کرنا غداری ہے؟ کیا دہشت گردی کی کمر توڑنا اور دہشت گردی کو منہ توڑ جواب دینا غداری ہے یا دہشت گردوں کو بریانی کھلانا اور ان کے ساتھ سمجھوتہ کرنا غداری تھا؟

انہوں نے کہا کہ راہل گاندھی جو زبان استعمال کر رہے ہیں وہ ان کی کمزوری کو ظاہر کرتی ہے۔ انہوں نے دعویٰ کیا کہ وزیر اعظم مودی کی قیادت میں ہندوستان دنیا کی سب سے تیزی سے ترقی کرنے والی معیشت بن گیا ہے اور ملک کی عالمی ساکھ مسلسل بڑھ رہی ہے۔

مودی کا پانچوں ممالک میں شاندار استقبال کیا گیا، مختلف تقریبات کا انعقاد کیا گیا اور ہندوستانی عوام نے ان کی عزت افزائی کی۔ ہندوستان کو تین بین الاقوامی اعزازات ملے۔ ایک طرح سے، پانچ ممالک، پانچ دن... یہ واضح پیغام دیتا ہے کہ ہندوستان عالمی سطح پر مضبوط کھڑا ہے۔ آج پوری دنیا ہندوستان کو ایک قابل اعتماد پارٹنر کے طور پر دیکھتی ہے۔

---------------

ہندوستان سماچار / عبدالسلام صدیقی