سلہٹ، 20 مئی (ہ س)۔ سلہٹ ٹیسٹ میں بنگلہ دیش کے خلاف 78 رنوں کی شکست اور مسلسل دوسری ٹیسٹ سیریز ہارنے کے بعد شان مسعود نے اپنی کپتانی کے مستقبل کے حوالے سے براہ راست سوالات کو پس پشت ڈالتے ہوئے کہا کہ ان کی پوری توجہ پاکستان کی ٹیسٹ کرکٹ کو بہتر بنانے پر مرکوز ہے۔

اس شکست کے ساتھ ہی پاکستان نے کئی شرمناک ریکارڈ اپنے نام کر لیے ہیں۔ بنگلہ دیش کے خلاف لگاتار چار ٹیسٹ ہارنے کے بعد، پاکستان زمبابوے کے بعد صرف دوسری ٹیم بن گئی ہے جو اس طرح کا شکار ہے۔ اسکے علاوہ یہ غیر ملکی سرزمین پر پاکستان کی مسلسل ساتویں ٹیسٹ شکست کی نشاندہی کرتا ہے، جو اس سلسلے میں ٹیم کے اب تک کے بدترین ریکارڈ کی برابری کرتا ہے۔

شان مسعود کی کپتانی کا ریکارڈ بھی مسلسل جانچ پڑتال کی زد میں ہے۔ ان کی قیادت میں پاکستان کو 16 ٹیسٹ میں 12 شکستوں کا سامنا کرنا پڑا ہے۔ پاکستان کے تمام کپتانوں میں، صرف مصباح الحق نے زیادہ شکستیں ریکارڈ کی ہیں- حالانکہ انہوں نے 56 ٹیسٹ میں ٹیم کی کپتانی کی۔

میچ کے بعد پریس کانفرنس سے خطاب کرتے ہوئے مسعود نے کہا کہ میرے ارادے ہمیشہ واضح رہے ہیں، میں نے یہ ذمہ داری پاکستان کی ٹیسٹ کرکٹ کو بہتر بنانے کے مقصد سے سنبھالی، آگے بڑھنے کے لیے جو بھی فیصلے کیے جاتے ہیں وہ بورڈ کے ہاتھ میں ہوتے ہیں، تاہم میری کوشش ہمیشہ یہ رہے گی کہ ٹیم آگے بڑھے اور بہتری کی جانب گامزن رہے۔ انہوں نے مزید کہا کہ یہ ضروری نہیں کہ میں صرف کپتانی کی کرسی پر براجمان رہ کر ہی اپنا حصہ ڈالوں۔ بطور کھلاڑی ہو یا کسی اور حیثیت میں، میں پورے خلوص کے ساتھ پاکستان کرکٹ کی خدمت کرتا رہوں گا۔ اس وقت ہمیں صرف تبدیلیوں پر بات کرنے کے بجائے اس بات پر توجہ دینی چاہیے کہ پاکستان کی ٹیسٹ کرکٹ میں بہتری کیسے لائی جا سکتی ہے۔

سلہٹ ٹیسٹ میں پاکستان نے پہلے ہی دن بنگلہ دیش کو چھ وکٹوں کے نقصان پر 116 رنز بنا لیا تھا۔ تاہم لٹن داس کی سنچری نے میچ کا رخ موڑ دیا۔ مسعود نے تسلیم کیا کہ ٹیم نے اہم لمحات میں غلطیاں کی ہیں۔ انہوں نے کہا کہ اگر ہم اس سیریز کو دیکھیں تو ہمارے پاس دونوں ٹیسٹ میچوں میں جیتنے کے مواقع تھے تاہم بیٹنگ، باؤلنگ اور فیلڈنگ میں ہم نے ہر شعبے میں غلطیاں کیں جس کی ہمیں بھاری قیمت چکانی پڑی، ٹیسٹ کرکٹ میں معمولی غلطیاں بھی پانچ دنوں کے دوران انتہائی مہنگی ثابت ہو سکتی ہیں۔

مسعود نے ٹیم میں بڑی تبدیلیوں کے مطالبات کا بھی جواب دیا۔ انہوں نے اس بات پر زور دیا کہ بہتری جذباتی ردعمل سے نہیں بلکہ ساختی اصلاحات سے آتی ہے۔ انہوں نے ریمارکس دیتے ہوئے کہا، ہمیں کرکٹ کے مخصوص برانڈ کا تعین کرنے کی ضرورت ہے جو ٹیم کھیلنا چاہتی ہے اور اس کی نشاندہی کرنے کی ضرورت ہے کہ ہماری کمزوریوں کو کیسے دور کیا جائے، اس سے کوئی فرق نہیں پڑتا کہ کھلاڑی 18 یا 40 سال کا ہے؛ واقعی اہم بات یہ ہے کہ وہ ٹیم کو مطلوبہ کردار ادا کر سکتا ہے یا نہیں۔ انہوں نے مزید کہا کہ جب آپ کو شکست کا سامنا کرنا پڑتا ہے تو آپ یقینی طور پر یہ دعویٰ نہیں کر سکتے کہ سب کچھ ٹھیک ہے۔ تاہم فیصلے لمحہ بہ لمحہ یا جذبات سے نہیں کیے جانے چاہئیں، ہمیں انہیں سمجھنے کے لیے مسائل کی جڑ تک تلاش کرنا چاہیے۔ پاکستان کی ٹیسٹ کرکٹ کی بہتری کے لیے ساختی تبدیلیاں ضروری ہیں۔

اگرچہ شان مسعود اس سیریز میں نصف سنچری بنانے میں کامیاب رہے لیکن ان کی بیٹنگ اوسط 26 سے کم رہی۔ اسی دوران محمد رضوان نے آخری ٹیسٹ میچ میں 94 رنز کی شاندار اننگز کھیلی۔ بنگلہ دیش کے لیے، تیج الاسلام نے دوسری اننگز میں چھ وکٹیں حاصل کرکے فتح کو یقینی بنانے میں اہم کردار ادا کیا۔

ہندوستھان سماچار

---------------

ہندوستان سماچار / عبدالواحد