نئی دہلی، 20 مئی (ہ س)۔ جنوبی کوریا کے دورے پر گئے وزیرِ دفاع راج ناتھ سنگھ نے سیول میں بھارتی برادری کے ایک پروگرام میں کہا کہ گزشتہ 12 برسوں میں ہونے والی تبدیلیوں نے ملک کے عوام کو یہ پختہ یقین دلایا ہے کہ بھارت کو ایک ترقی یافتہ ملک بننے سے دنیا کی کوئی بھی طاقت نہیں روک سکتی۔ انہوں نے کوریا کے اُن بہادر فوجیوں کو خراجِ عقیدت پیش کیا جنہوں نے ملک کی خدمت میں اپنی جانوں کا نذرانہ پیش کیا۔

جنوبی کوریا کے وزیرِ دفاع کے ساتھ انہوں نے دونوں ممالک کے درمیان دفاعی تعاون کو مزید مضبوط بنانے کے طریقوں پر تبادلۂ خیال کیا، جس میں علاقائی امن، استحکام اور تکنیکی تعاون کے عزم کا اظہار کیا گیا۔

سیول میں جنوبی کوریا کے دفاعی خریداری پروگرام انتظامیہ کے وزیر لی یونگ چُل کے ساتھ وزیرِ دفاع راجناتھ سنگھ کی ملاقات ہوئی۔ دونوں وزراء نے مشترکہ ترقی، مشترکہ پیداوار اور مشترکہ برآمدات کے لیے راستے ہموار کرنے پر اتفاق کیا۔ دونوں ممالک کے ماحولیاتی نظام کو ایک ساتھ لانے کے لیے روڈ میپ پر بھی گفتگو ہوئی۔

راجناتھ سنگھ نے سیول میں اپنے جنوبی کوریائی ہم منصب آہن گیو کے ساتھ ملاقات میں دونوں ممالک کے دفاع، دفاعی صنعت اور اسٹریٹجک تعاون کو مزید مضبوط بنانے کے طریقوں پر تبادلۂ خیال کیا، جس میں علاقائی امن، استحکام اور تکنیکی تعاون کے عزم کا اعادہ کیا گیا۔

دونوں وزرائے دفاع نے نیشنل ڈیفنس کالج آف انڈیا اور کوریا نیشنل ڈیفنس یونیورسٹی کے درمیان دفاعی سائبر تعاون کو فروغ دینے اور اقوامِ متحدہ کے امن مشن تعاون سے متعلق معاہدوں کا تبادلہ بھی کیا، جس سے بھارت اور کوریا کے درمیان شراکت داری مزید مضبوط اور ہمہ جہت بن گئی۔

سیول میں بھارتی برادری کے پروگرام سے خطاب کرتے ہوئے راجناتھ سنگھ نے کہا کہ پہلے ہمیں جو بھی چیز درکار ہوتی تھی، ہم دوسرے ممالک سے درآمد کرتے تھے، مگر اب حالات بدل چکے ہیں۔ پہلے بھارت بیرونِ ملک سے ہتھیار درآمد کرتا تھا، لیکن آج ہم دفاعی سازوسامان برآمد کر رہے ہیں، جس میں ویپن سسٹمز اور دیگر آلات شامل ہیں۔ ہم 40 ہزار کروڑ روپے سے زیادہ کی برآمدات کر رہے ہیں۔

انہوں نے کہا کہ دونوں ممالک کے درمیان خصوصی اسٹریٹجک شراکت داری مزید مضبوط ہونے کی امید ہے۔ آج کا بھارت بالکل مختلف ہے۔ بھارت سیمی کنڈکٹر شعبے میں تیزی سے آگے بڑھ رہا ہے۔

وزیرِ دفاع راج ناتھ سنگھ نے کہا کہ ماہرینِ معاشیات ہمارے ترقیاتی ماڈل کو ویلفیئر پالیٹکس کا نیا ماڈل قرار دے رہے ہیں، جس سے لوگوں کی زندگی بہتر ہو رہی ہے۔ بارہ سال پہلے شاید ہی کسی نے سوچا ہوگا کہ آنے والا عشرہ بھارت کے لیے تبدیلی کا عشرہ ثابت ہوگا، لیکن ان 12 برسوں میں ہونے والی تبدیلیوں نے ملک کے عوام کو یہ مضبوط یقین دلایا ہے کہ بھارت ایک ترقی یافتہ بھارت بنے گا اور دنیا کی کوئی بھی طاقت اسے روک نہیں سکتی۔

ہندوستھان سماچار

---------------

ہندوستان سماچار / عبدالواحد