اب یو اے وی سے داغی جاسکے گی گائڈیڈ میزائل،ڈی آر ڈی او نے ٹیسٹ مکمل کیے

یہ کارنامہ آندھرا پردیش میں کرنول کے قریب ڈی آر ڈی او ٹیسٹ رینج میں حاصل کیا گیا ۔

نئی دہلی، 20 مئی (ہ س)۔

بھارت اب بغیر پائلٹ کے فضائی گاڑی (یو اے وی) سے پریسجن گائیڈڈ میزائل (یو ایل پی جی ایم)-وی3 لانچ کرکے دشمن کے ڈرون، ہیلی کاپٹروں اور دیگر فضائی اہداف کو نشانہ بنا سکتا ہے۔ یہ کارنامہ آندھرا پردیش میں کرنول کے قریب ڈی آر ڈی او ٹیسٹ رینج میں کئے گئے حتمی ترقیاتی ٹرائلز میں حاصل کیا گیا۔ ڈی آر ڈی او نے یہ ٹیسٹ یو اے وی کا استعمال کرتے ہوئے کیے، جس میں ہوا سے سطح اور ہوا سے ہوا میں مار کرنے کی صلاحیتیں ہیں۔

ڈیفنس ریسرچ اینڈ ڈیولپمنٹ آرگنائزیشن (ڈی آر ڈی او) نے آندھرا پردیش میں کرنول کے قریب ڈی آر ڈی او ٹیسٹ رینج میں ہوا سے سطح اور ہوا سے ہوا میں مار کرنے کی صلاحیت کے ساتھ بغیر پائلٹ کے فضائی وہیکل لانچڈ پریسجن گائیڈڈ میزائل (یو ایل پی جی ایم)-وی3 کے آخری ورژن کے ترقیاتی ٹرائلز کو کامیابی سے مکمل کر لیا ہے۔ یہ ٹرائلز انٹیگریٹڈ گراونڈ کنٹرول سسٹم (جی سی ایس) کے ذریعے کیے گئے تھے جس کا مقصد یو ایل پی جی ایم ہتھیاروں کے نظام کی موثر کمانڈ اور کنٹرول کو یقینی بنانا تھا۔ جی سی ایس نظام جدید ترین ٹیکنالوجیز سے لیس ہے جو تیاری، ہدف بنانے اور لانچ کرنے کے عمل کو خودکار بنا کر مشن کی کارکردگی اور درستگی کو بڑھاتا ہے۔

ڈی آر ڈی او نے میزائلوں کی ترقی اور پیداوار کے لیے دو پروڈکشن ایجنسیوں، حیدرآباد میں بھارت ڈائنامکس لمیٹڈ اور حیدرآباد میں قائم اڈانی ڈیفنس سسٹمز اینڈ ٹیکنالوجیز لمیٹڈ کے ساتھ شراکت داری کی ہے۔ موجودہ ٹرائلز کے لیے، سسٹم کو بنگلورو میں قائم نیو اسپیس ریسرچ اینڈ ٹیکنالوجیز کے تیار کردہ یو اے وی میں ضم کر دیا گیا ہے۔ یو ایل پی جی ایم میزائل کو حیدرآباد میں قائم امارت ریسرچ سنٹر نے نوڈل لیبارٹری کے طور پر ڈیفنس ریسرچ اینڈ ڈیولپمنٹ لیبارٹری (ڈی آر ڈی ایل)، حیدرآباد، ٹرمینل بیلسٹکس ریسرچ لیبارٹری (ٹی بی آر ایل)، چنڈی گڑھ اور ہائی انرجی میٹریل ریسرچ لیبارٹری (ایچ ای ایم آر ایل)، پونے کے تعاون سے تیار کیا ہے۔

وزیردفاع راج ناتھ سنگھ نے یو ایل پی جی ایم-وی3 کے کامیاب ٹرائل پر ڈی آر ڈی او، پبلک سیکٹر کے اداروں، دفاعی پیداوار کے شراکت داروں اور صنعت کو مبارکباد دی۔ انہوں نے کہا کہ ٹینک شکن کردار کے لیے ایئر ٹو سرفیس موڈ اور ڈرونز، ہیلی کاپٹروں اور دیگر فضائی اہداف کو شامل کرنے کے لیے ایئر ٹو ایئر موڈ میں اس کی کامیابی دفاعی شعبے میں خود انحصاری کی جانب ایک اہم اسٹریٹجک کامیابی ہے۔ ڈاکٹر سمیر وی کامت، سکریٹری، محکمہ دفاعی تحقیق اور ترقی اور چیئرمین، ڈی آر ڈی او، نے اس قابل تعریف کامیابی کے لیے ٹرائلز میں شامل تمام ٹیموں کو مبارکباد دی۔

ہندوستھان سماچار

ہندوستان سماچار / عبدالسلام صدیقی