نئی دہلی، 20 مئی (ہ س)۔ بھارتیہ جنتا پارٹی (بی جے پی) نے لوک سبھا میں قائد حزب اختلاف راہل گاندھی کی طرف سے وزیر اعظم نریندر مودی اور وزیر داخلہ امت شاہ کے خلاف جارحانہ زبان کے استعمال پر سخت ردعمل کا اظہار کیا ہے۔ بی جے پی نے راہل گاندھی کے بیان کو بدقسمتی اور ان کی مایوسی کا مظہر قرار دیا۔

بدھ کو میڈیا سے بات کرتے ہوئے بی جے پی کے قومی صدر نتن نوین نے کہا کہ راہل گاندھی کا بیان انتہائی افسوسناک ہے اور ان کی انتشارپسند ذہنیت کی عکاسی کرتا ہے۔ انہوں نے کہا کہ ہندوستانی سیاست میں مریادا اور سماجی ہم آہنگی کی جڑیں باہمی احترام میں ہیں لیکن راہل گاندھی کے تبصروں نے ان اقدار کو پارہ پارہ کر دیا ہے۔ ان کے الفاظ مایوسی اور شکست خوردگی کی واضح عکاسی کرتے ہیں۔

بی جے پی صدر نے کہا، مسلسل انتخابی شکست اور اس کے نتیجے میں پیدا ہونے والی مایوسی اب راہل گاندھی کے مزاج اور رویے میں واضح طور پر نظر آرہی ہے۔ یہی مایوسی انہیں اس طرح کے بیانات دینے پر مجبور کر رہی ہے۔

انہوں نے کہا کہ راہل گاندھی کا بیان نہ صرف وزیر اعظم بلکہ ملک کے 1.4 ارب عوام کی بھی توہین ہے۔ اپوزیشن مایوسی کے عالم میں ایسی اشتعال انگیز زبان استعمال کر رہی ہے۔ راہل گاندھی نے اپنی ماضی کی غلطیوں سے سبق نہیں سیکھا ہے۔

اتر پردیش کے رائے بریلی میں ایک جلسہ عام سے خطاب کرتے ہوئے اپوزیشن لیڈر راہل گاندھی نے مبینہ طور پر وزیر اعظم نریندر مودی اور وزیر داخلہ امت شاہ کے لیے 'غدار' کا لفظ استعمال کیا۔

ہندوستھان سماچار

---------------

ہندوستان سماچار / عبدالسلام صدیقی