رامبن میں 20 روز بعد بشلری نالے سے لاپتہ نوجوان کی لاش برآمد ہوئی

جموں، 02 مئی (ہ س)۔ ضلع رامبن میں قریب بیس روز سے لاپتہ 22 سالہ نوجوان کی لاش ہفتہ کے روز نالہ بشلری سے برآمد کر لی گئی، جس کے ساتھ ایک طویل اور کثیر ایجنسی سرچ آپریشن کا افسوسناک اختتام ہوا۔ مہلوک کی شناخت تنویر احمد چوپان ولد عبدالسلام چوپان ساکن منڈکھل پوگل کے طور پر ہوئی ہے۔ اطلاعات کے مطابق وہ 12 اپریل کو اس وقت لاپتہ ہو گیا تھا جب وہ جموں سے ایک دودھ دینے والی گائے اور دو بچھڑوں کے ساتھ سفر کر رہا تھا اور مبینہ طور پر مکرکوٹ کے قریب جموں–سری نگر قومی شاہراہ پر کچھ مشتبہ گاؤ رکھشکوں کے تعاقب سے بچنے کے لیے نالے میں چھلانگ لگا دی تھی۔

رپورٹس کے مطابق نوجوان کو ڈیگڈول کے نزدیک دو گاڑیوں میں سوار افراد نے روکنے اور تعاقب کرنے کی کوشش کی، جس کے باعث وہ خوفزدہ ہو کر نالہ بشلری میں کود گیا اور اس کے بعد سے لاپتہ تھا۔ واقعے کے فوراً بعد پولیس اور مقامی رضاکاروں نے بڑے پیمانے پر تلاش مہم شروع کی، جس میں بعد ازاں نیشنل ڈیزاسٹر ریسپانس فورس ، فوج، کوئیک رسپانس ٹیم رامبن، ہمالیائی کیو آر ٹی، رامسو، کھڑی کی ٹیمیں، این جی او بانہال والنٹیئرز، ریڈ کراس بانہال اور ڈوڈہ کی تنظیم ابابیل بھی شامل ہوئیں۔ دشوار گزار علاقے اور تیز بہاؤ کے باوجود تلاش کا عمل مسلسل جاری رکھا گیا۔

حکام کے مطابق ہفتہ کے روز ڈیگڈول کے قریب نالے میں لاش نظر آئی، جسے ریسکیو ٹیموں نے برآمد کیا۔ لاش بوسیدہ حالت میں تھی اور اسے قانونی و طبی کارروائی کے لیے اسپتال منتقل کیا جا رہا ہے۔ پولیس نے اس معاملے میں پہلے ہی مقدمہ درج کر کے چار ملزمان سرجیت سنگھ، سندیپ سنگھ، دگ وجے سنگھ اور کیول سنگھ کو گرفتار کر لیا ہے، جو رامبن قصبہ اور قریبی سیری علاقوں کے رہائشی بتائے جاتے ہیں۔

تحقیقات کے لیے ایک خصوصی تحقیقاتی ٹیم تشکیل دی گئی ہے، جس کی سربراہی ایس ڈی پی او بانہال سریندر سنگھ بلوریا کر رہے ہیں۔ انہوں نے بتایا کہ لاش ڈیگڈول کے علاقے سے برآمد ہوئی ہے اور اسے قانونی کارروائی کے لیے اسپتال منتقل کیا جا رہا ہے، مزید تفتیش جاری ہے۔دریں اثنا، واقعے پر اہل خانہ میں گہرے رنج و غم کے ساتھ شدید غم و غصہ پایا جا رہا ہے۔ خاندان کا الزام ہے کہ تعاقب اور ہراسانی کے نتیجے میں نوجوان کی موت واقع ہوئی۔ انہوں نے غیر جانبدارانہ تحقیقات اور ذمہ داروں کے خلاف سخت کارروائی کا مطالبہ کیا ہے۔

ہندوستھان سماچار

---------------

ہندوستان سماچار / محمد اصغر