کشن گنج، 2 مئی (ہ س)۔ضلع میں اغوا کے ایک معاملے کو پولیس نے محض 24 گھنٹے کے اندرحل کرتے ہوئے مغوی انیس الرحمان کو بحفاظت برآمدکرلیا۔ اس دوران پولیس نے اغوا میں ملوث دو ملزمین کو گرفتار کرلیا جب کہ باقی بدمعاشوں کی گرفتاری کے لیے چھاپہ ماری کی جارہی ہے۔ موصولہ اطلاع کے مطابق 30 اپریل کو دوپہر تقریباً 12:30 بجے شکایت کنندہ افسانہ خاتون نے آدرش تھانہ کشن گنج میں ایک تحریری درخواست جمع کرائی جس میں کہا گیا کہ ان کے شوہرانیس الرحمان کو تین نمبرریلوے کراسنگ کے قریب سے اغوا کیا گیا ہے۔اغوا کاراہل خانہ سے تاوان کا مطالبہ کر رہے تھے اور رقم نہ دینے پر جان سے مارنے کی دھمکیاں دے رہے تھے۔ اس معاملے میں پولیس سپرنٹنڈنٹ سنتوش کمار کی ہدایات پر کشن گنج تھانہ مقدمہ نمبر 461/26 کے تحت آئی پی سی کی دفعہ 140(2)/3(5) کے تحت ایف آئی آر درج کرنے کے بعد ایک خصوصی ٹیم تشکیل دی گئی تھی۔ ٹیم نے تیزی سے کام کیا اور مغوی کو بحفاظت بازیاب کرالیا۔ آپریشن کے دوران پولیس نے محمد ظاہر حسین (نونیا ٹولی) اور منظر عالم (چکلہ بیلوا کدوباری) کو گرفتارکرلیا۔تفتیش کے دوران ملزمین نے انکشاف کیا کہ ان پر انیس الرحمان کے ساڑھے تین لاکھ روپے واجب الادا تھے جس کی وجہ سے انہیں اغوا کیا گیا۔ چھاپہ ماری ٹیم میں زونل پولیس انسپکٹر راجہ، ٹاؤن تھانہ انچارج نثار احمد، ضلع انٹیلی جنس یونٹ کی ایک ٹیم، دھن پورہ پکٹ انچارج پردیپ کمار، دیگر پولیس افسران اور مسلح افواج کے ساتھ شامل تھے۔ پولیس کا کہنا ہے کہ وہ معاملے کے باقی ملزمین کی گرفتاری جاری رکھے ہوئے ہے۔ہندوستھان سماچار

ہندوستان سماچار / Mohammad Afzal Hassan