جموں, یکم مئی (ہ س)۔

این ایچ پی سی کے ایگزیکٹو ڈائریکٹر انیش گوراہا نے جمعہ کے روز جموں و کشمیر اور لداخ خطے کے لیے کمپنی کے علاقائی سربراہ کا عہدہ سنبھال لیا۔سرکاری ترجمان کے مطابق گوراہا نے جموں میں قائم این ایچ پی سی کے علاقائی دفتر کا چارج لیتے ہی اپنی ذمہ داریاں سنبھال لیں اور اب وہ دونوں مرکزی زیر انتظام علاقوں میں کمپنی کے پاور اسٹیشنز اور جاری پروجیکٹس کی نگرانی کریں گے۔

عہدہ سنبھالنے کے فوراً بعد انہوں نے سلال پاور اسٹیشن اور ساولاکوٹ ہائیڈرو الیکٹرک پروجیکٹ کے افسران کے ساتھ میٹنگ کی اور جاری کاموں کا جائزہ لیا۔ اس موقع پر انہوں نے آپریشنل کارکردگی کو بہتر بنانے پر زور دیتے ہوئے ملازمین کو ہدایت دی کہ وہ پائیدار توانائی کے فروغ کے لیے سنجیدگی اور عزم کے ساتھ کام کریں۔ترجمان نے بتایا کہ انیش گوراہا تقریباً 29 برس کے تجربے کے حامل ایک سینئر پیشہ ور ہیں۔ وہ جی ای سی بلاسپور، چھتیس گڑھ سے الیکٹریکل انجینئرنگ میں گریجویٹ ہیں اور ہیومن ریسورسز میں ایم بی اے کی ڈگری رکھتے ہیں۔انہوں نے 1997 میں این ایچ پی سی کے سلال پاور اسٹیشن سے اپنے کیریئر کا آغاز کیا اور بعد ازاں تتاپانی جیوتھرمل پروجیکٹ اور کارپوریٹ دفتر کے ڈیزائن ڈویژن سمیت مختلف اہم عہدوں پر خدمات انجام دیں۔

ہندوستھان سماچار

---------------

ہندوستان سماچار / محمد اصغر