بی جے پی پر حلقہ بندی کے ذریعے ملک تقسیم کرنے کا الزامممبئی ، 20 اپریل (ہ س)۔ کانگریس ورکنگ کمیٹی کی رکن اور رکن پارلیمنٹ پرنیتی شندے نے کہا ہے کہ خواتین ریزرویشن کے معاملے پر کھلی بحث کے لیے کانگریس تیار ہے اور وزیر اعلیٰ دیویندر فڑنویس کو چیلنج دیا کہ وہ وقت اور مقام طے کریں اور وزیر اعظم نریندر مودی کو بھی اس بحث میں شامل کریں۔ انہوں نے الزام عائد کیا کہ بی جے پی نے خواتین ریزرویشن کے نام پر خصوصی پارلیمانی اجلاس بلایا، لیکن اس کے ایجنڈے میں اس کا کوئی ذکر نہیں تھا۔ممبئی کے تلک بھون میں منعقدہ ایک خصوصی پریس کانفرنس سے خطاب کرتے ہوئے پرنیتی شندے اور رکن پارلیمنٹ شوبھاتائی بچاؤ نے بی جے پی پر سخت تنقید کی۔ پرنیتی شندے نے کہا کہ بی جے پی دراصل خواتین ریزرویشن کے نام پر حلقہ بندی کا بل منظور کروا کر ملک میں تقسیم پیدا کرنا چاہتی تھی، لیکن کانگریس سمیت تمام اپوزیشن جماعتوں نے اس “سازش” کو ناکام بنا دیا، جس کے بعد حکومت بیک فٹ پر آ گئی ہے۔انہوں نے کہا کہ 2023 میں خواتین ریزرویشن بل پہلے ہی اتفاق رائے سے منظور ہو چکا ہے، لیکن بی جے پی حکومت نے اس میں مردم شماری اور حلقہ بندی جیسی دو شرائط شامل کر دیں۔ کانگریس کا مطالبہ تھا کہ ان شرائط کے بغیر موجودہ 543 لوک سبھا نشستوں میں ہی 33 فیصد ریزرویشن دیا جائے، تاہم بی جے پی نے اس مطالبے کو نظر انداز کیا۔

پرنیتی شندے نے الزام لگایا کہ 16 اپریل 2023 کو بل پیش کرنے کی کوشش دراصل ایک سیاسی چال تھی، جس کا مقصد حلقہ بندی کے ذریعے جنوبی اور شمالی ریاستوں کے درمیان خلیج پیدا کرنا تھا۔ انہوں نے کہا کہ بی جے پی نے اس کے ساتھ ساتھ یہ تاثر دینے کی ناکام کوشش کی کہ کانگریس اور انڈیا اتحاد خواتین مخالف ہیں۔

اس موقع پر شوبھاتائی بچاؤ نے کہا کہ سابق وزیر اعظم راجیو گاندھی نے پنچایت راج بل کے ذریعے مقامی اداروں میں خواتین کو 33 فیصد ریزرویشن دیا تھا، جبکہ سونیا گاندھی نے اسے بڑھا کر 50 فیصد تک پہنچایا۔ انہوں نے کہا کہ اس وقت کانگریس نے کوئی شرط عائد نہیں کی تھی، اور آج ملک میں تقریباً 15 لاکھ خواتین مقامی اداروں میں خدمات انجام دے رہی ہیں، جو کانگریس کی پالیسیوں کا نتیجہ ہے۔انہوں نے مزید کہا کہ بی جے پی خواتین مخالف ہے اور جھوٹا بیانیہ پھیلا رہی ہے، لیکن خواتین اس پروپیگنڈے کا شکار نہیں ہوں گی۔ شوبھاتائی بچاؤ نے کہا کہ اگر خواتین ریزرویشن بل کو 2024 کے لوک سبھا انتخابات سے پہلے نافذ کیا جاتا تو آج 543 نشستوں میں تقریباً 180 خواتین ارکان پارلیمنٹ موجود ہوتیں، لیکن بی جے پی کی پالیسیوں نے یہ ممکن نہیں ہونے دیا۔ہندوستھان سماچار

ہندوستان سماچار / جاوید این اے