جموں, 18 اپریل (ہ س)۔ ضلع کشتواڑ میں ٹرانسپورٹ حکام نے ٹریفک خلاف ورزی کرنے والوں کے خلاف بڑی کارروائی کرتے ہوئے 246 گاڑیوں کے خلاف سخت اقدامات کیے ہیں، جن میں رجسٹریشن سرٹیفکیٹس (آر سی) اور روٹ پرمٹس کی معطلی شامل ہے، جبکہ متعدد گاڑیوں کو بلیک لسٹ بھی کیا گیا ہے۔حکام کے مطابق یہ کارروائی ٹرانسپورٹ کمشنر جموں و کشمیر کی ہدایات پر عمل کرتے ہوئے اسسٹنٹ ریجنل ٹرانسپورٹ آفیسر (آر ٹی او) کشتواڑ کی جانب سے انجام دی گئی۔ مجموعی طور پر 246 گاڑیوں میں سے 193 نجی گاڑیاں ہیں، جن میں 171 دو پہیہ اور 22 ہلکی موٹر گاڑیاں شامل ہیں، جبکہ 53 کمرشل گاڑیاں بھی کارروائی کی زد میں آئی ہیں۔تفصیلات کے مطابق 203 گاڑیوں کے آر سی معطل کیے گئے ہیں، 43 کمرشل گاڑیوں کے روٹ پرمٹس معطل کیے گئے ہیں اور 66 گاڑیوں کو بلیک لسٹ کیا گیا ہے۔ یہ کارروائی ان افراد کے خلاف کی گئی ہے جو موٹر وہیکلز ایکٹ کے تحت پانچ سے زائد مرتبہ ٹریفک قوانین کی خلاف ورزی کرتے ہوئے پکڑے جا چکے ہیں۔

حکام نے بتایا کہ ان خلاف ورزیوں میں ہیلمٹ اور سیٹ بیلٹ کا استعمال نہ کرنا، اوور اسپیڈنگ، اوور لوڈنگ، نشے کی حالت میں ڈرائیونگ اور ڈرائیونگ کے دوران موبائل فون کا استعمال شامل ہیں۔آرڈر کے مطابق یہ معطلی تین ماہ کے لیے نافذ کی گئی ہے اور اس دوران مذکورہ گاڑیوں کو سڑکوں پر چلانے کی اجازت نہیں ہوگی۔ مالکان کو ہدایت دی گئی ہے کہ وہ اپنے اصل دستاویزات آر ٹی او دفتر میں جمع کرائیں۔محکمہ ٹرانسپورٹ نے پولیس اور ٹریفک حکام کو ہدایت دی ہے کہ وہ اس حکم پر سختی سے عمل درآمد کو یقینی بنائیں اور خلاف ورزی کی صورت میں گاڑیوں کو ضبط کیا جائے۔ ساتھ ہی عوام سے اپیل کی گئی ہے کہ وہ ٹریفک قوانین کی پابندی کریں تاکہ سڑکوں پر حفاظت کو یقینی بنایا جا سکے۔

ہندوستھان سماچار

---------------

ہندوستان سماچار / محمد اصغر