رتلام، 18 اپریل (ہ س)۔

مدھیہ پردیش کے رتلام ضلع کے کرمدی گرام پنچایت کے تحت متھوری تالاب میں ہفتہ کی دوپہر دو نامعلوم افراد کی لاشیں برآمد ہوئی ہیں۔ اطلاع ملنے پر پولیس موقع پر پہنچی اورغوطہ خوروں کی مدد سے لاشوں کو تالاب سے نکال کر اسپتال پہنچایا۔ پولیس نے معاملے کی جانچ شروع کر دی ہے۔

پولیس کے مطابق، گرام پنچایت کرمدی کے متھوری تالاب میں ہفتہ کی دوپہر تقریباً 1.30 بجے مقامی لوگوں نے دو افراد کی لاشیں پانی میں تیرتی ہوئی دیکھیں اور پولیس کو اطلاع دی۔ لاشیں ملنے کے بعد موقع پر بڑی تعداد میں لوگ جمع ہو گئے۔ اطلاع ملتے ہی مانک چوک تھانہ انچارج پاتی رام ڈاوڑے پولیس فورس کے ساتھ موقع پر پہنچے۔ تالاب سے لاشوں کو باہر نکالنے کے لیے غوطہ خوروں کو بلایا گیا۔

مانک چوک تھانہ انچارج پاتی رام ڈاوڑے نے بتایا کہ پولیس نے لاشوں کو تالاب سے نکال کر پوسٹ مارٹم کے لیے بھیج دیا ہے۔ دونوں لاشیں مردوں کی ہیں، جن کی تخمینی عمر 30 سے 32 سال کے درمیان ہے۔ فی الحال پولیس مقامی لوگوں سے پوچھ گچھ میں مصروف ہے، تاکہ متوفیان کی شناخت کی جا سکے۔ اس واقعہ کے بعد علاقے میں سنسنی پھیل گئی ہے۔

ہندوستھان سماچار

ہندوستان سماچار / انظر حسن