ایمرجنسی کیس میں رسپانس ٹائم دیکھنے کے لیے موک ڈرل کی گئی

بھوپال، 18 اپریل (ہ س)۔ مدھیہ پردیش کے دارالحکومت بھوپال میں ہنگامی طبی حالات میں مریض کو بروقت علاج ملنے کے انتظامات دیکھنے کے لیے جمعہ اور ہفتہ کی درمیانی رات سول اسپتال بیراگڑھ میں موک ڈرل کی گئی۔ یہ کارروائی انتہائی خفیہ طریقے سے کی گئی۔ اس دوران اسپتال سپرنٹنڈنٹ سمیت اسپتال کے کسی بھی عملے کو موک ڈرل کی اطلاع نہیں تھی۔

سی ایم ایچ او ٹیم کی جانب سے انہیں بتایا گیا کہ ایک سنگین ’ہائی رسک‘ حاملہ خاتون کو اسپتال لایا جا رہا ہے، جس کا فوری آپریشن کیا جانا ضروری ہے۔ سی ایم ایچ او ڈاکٹر منیش شرما کی ہدایت پر موک ڈرل کے لیے جمعہ کی رات 12 بجے معائنہ ٹیم اسپتال پہنچی تھی۔ ٹیم نے سب سے پہلے ڈیوٹی ڈاکٹر کو ہائی رسک حاملہ خاتون کے اسپتال پہنچنے کی اطلاع دے کر ’آن کال‘ ڈاکٹروں کو بلانے کے لیے کہا۔ اس دوران اسپتال میں موجود ڈیوٹی ڈاکٹر اور اسٹاف نرس کو سخت ہدایت دی گئی کہ ٹیم کی آمد کی اطلاع سپرنٹنڈنٹ سمیت اسپتال کے کسی دوسرے عملے کو نہیں دی جائے گی۔

ڈیوٹی ڈاکٹر نے فوری طور پر ماہرِ امراضِ نسواں، ماہرِ امراضِ اطفال اور اینستھیزیا کے ماہر کو کال کر کے اسپتال آنے کے لیے کہا۔ ساتھ ہی آپریشن تھیٹر کو چالو کروا کر اسپتال میں خون کی دستیابی چیک کی گئی۔ تقریباً 30 سے 40 منٹ میں ماہرِ امراضِ نسواں، ماہرِ امراضِ اطفال، ماہرِ اینستھیزیا اور او ٹی انچارج نے اسپتال پہنچ کر آپریشن کی تیاریاں مکمل کیں۔ سی-سیکشن کی تمام تیاریاں مکمل ہونے کے بعد سی ایم ایچ او ٹیم نے موک ڈرل کا انکشاف کیا۔

چیف میڈیکل اینڈ ہیلتھ آفیسر ڈاکٹر منیش شرما نے بتایا کہ اسپتال میں سنگین کیس پہنچنے پر کم سے کم وقت میں علاج فراہم کر کے خطرے کے امکانات کو کم سے کم کیا جا سکتا ہے۔ اسے دیکھنے کے لیے اسپتال میں موک ڈرل کی گئی ہے۔ ڈیوٹی روسٹر پر سختی سے عمل کرنے، رسپانس ٹائم کو کم سے کم کرنے اور آن کال ڈاکٹروں کے متبادل فون نمبر رکھنے کی ہدایات دی گئی ہیں۔

ہندوستھان سماچار

---------------

ہندوستان سماچار / انظر حسن