کولکاتا، 16 اپریل (ہ س)۔ مغربی بنگال کی حکمراں ترنمول کانگریس نے جمعرات کو سابق ایم ایل اے ہمایوں کبیر کے خلاف الیکشن کمیشن سے رجوع کیا۔ پارٹی نے الزام لگایا کہ آئندہ اسمبلی انتخابات میں الیکشن لڑنے کے لئے اپنی الگ سیاسی پارٹی بنانے والے ہمایوں کبیر نے ضابطہ اخلاق کی خلاف ورزی کی ہے۔
ریاست کے چیف الیکٹورل آفیسر کے دفتر کو بھیجے گئے ای میل میں ترنمول کانگریس نے ہمایوں کبیر پر پارٹی کے کئی سینئر لیڈروں کے خلاف توہین آمیز اور ذاتی تبصرہ کرنے کا الزام لگایا ہے۔ شکایت میں ایک پریس کانفرنس کا ویڈیو بھی شامل ہے جس میں کبیر مبینہ طور پر اس طرح کے بیانات دیتے ہوئے نظر آ رہے ہیں۔ ان تبصروں میں پارٹی کے جنرل سکریٹری ابھیشیک بنرجی کا بھی ذکر ہے۔
پارٹی نے اپنی شکایت میں کہا کہ اس طرح کے بیانات مثالی ضابطہ اخلاق کی صریح خلاف ورزی ہیں۔ قواعد کے تحت، کسی امیدوار کو کسی شخص کی ذاتی زندگی پر حملہ کرنے یا غیر اخلاقی یا اخلاقی طور پر جارحانہ تبصرے کرنے کی اجازت نہیں ہے۔
ترنمول نے یہ بھی دعویٰ کیا کہ ہمایوں کبیر کے بیانات تعزیرات ہند 2023 کی دفعہ 356، 351، اور 174 کی خلاف ورزی کرتے ہیں۔ پارٹی نے مطالبہ کیا ہے کہ الیکشن کمیشن ہمایوں کبیر کو شوکاز نوٹس جاری کرے، متعلقہ ایجنسی کو ان کے خلاف ایف آئی آر درج کرنے کی ہدایت کرے اور سخت کارروائی کرے۔
حال ہی میں، ترنمول کانگریس نے ایک ویڈیو جاری کیا جس میں الزام لگایا گیا کہ کبیر نے بھارتیہ جنتا پارٹی (بی جے پی) کے ساتھ ہزاروں کروڑ روپے کا معاہدہ کیا ہے جس کا مقصد آئندہ دو مرحلوں کے اسمبلی انتخابات میں اقلیتی ووٹوں کو تقسیم کرنا ہے۔ تاہم، کبیر نے ویڈیو کو جعلی اور مصنوعی ذہانت سے تیار کردہ قرار دیا ہے۔ بی جے پی نے بھی ایسی کسی ڈیل سے انکار کیا ہے۔
ویڈیو جاری ہونے کے بعد آل انڈیا مجلس اتحاد المسلمین (اے آئی ایم آئی ایم) کے سربراہ اور حیدرآباد لوک سبھا کے رکن پارلیمنٹ اسد الدین اویسی نے ہمایوں کبیر اور ان کی پارٹی سے اعلان کردہ اتحاد توڑ دیا ہے۔
ہندوستھان سماچار
ہندوستان سماچار / محمد شہزاد
