کولکاتا، 16 اپریل (ہ س)۔ مغربی بنگال اسمبلی انتخابات 2026 کے اعلان کے بعد ریاست میں سیاسی گھمسان تیز ہوگیا ہے۔ انتخابی مہم اور روڈ شو کے درمیان، ترنمول کانگریس کے قومی جنرل سکریٹری اور لوک سبھا ممبر پارلیمنٹ ابھیشیک بنرجی نے وزیر اعظم نریندر مودی، وزیر داخلہ امت شاہ، اور بھارتیہ جنتا پارٹی (بی جے پی) پر سخت حملہ کیا۔
سوشل میڈیا پلیٹ فارم ایکس پر ایک پوسٹ میں رکن پارلیمنٹ ابھیشیک بنرجی نے الزام عائد کیا کہ انتخابی کمیشن بنگال میں بی جے پی کے لیے حقیقی کام کر رہا ہے۔ انہوں نے لکھا کہ جو بھی یہ مانتا ہے کہ نریندر مودی، امت شاہ یا یوگی آدتیہ ناتھ بنگال میں بی جے پی کے ٹرمپ کارڈ ہیں، تووہ غلط ہے۔ ان کے مطابق ،پس پردہ الیکشن کمیشن حقیقی کردار ادا کر رہا ہے اور بی جے پی کی ہدایات کے مطابق کام کر رہا ہے۔
انہوں نے یہ بھی دعویٰ کیا کہ بی جے پی احکامات جاری کرتی ہے اور انتخابی کمیشن ان پر عمل کرنے کے لئے پابند رہتا ہے۔ انہوں نے کہا کہ انتخابی ماحول میں ان کے خاندان اور ترنمول کانگریس سے وابستہ افراد کو نشانہ بنایا جا رہا ہے۔
دریں اثنا، مرکزی حکومت نے سیکورٹی مقاصد کے لیے بنگال میں بڑی تعداد میں مرکزی فورسز کو تعینات کر دیا ہے۔ تقریباً 2550 کمپنیوں کی تعیناتی کے حوالے سے بھی سیاسی بحث تیز ہو گئی ہے۔ ابھیشیک بنرجی نے اس پر سوال اٹھاتے ہوئے کہا کہ دوسری ریاستوں میں ان فورسز کی زیادہ ضرورت ہے، لیکن انہیں بنگال میں تعینات کیا جا رہا ہے۔
انہوں نے مزید کہا کہ ترنمول کانگریس کے کارکنوں کو دھمکانے اور دبانے کی کوششیں کی جا رہی ہیں لیکن انتخابی نتائج کے بعد صورتحال بدل جائے گی۔ انہوں نے یہ بھی کہا کہ جو لوگ آج ان کے کارکنوں کو روکنے یا ڈرانے کی کوشش کر رہے ہیں وہ نتائج کے بعد ریاست میں نظر نہیں آئیں گے۔
ہندوستھان سماچار
ہندوستان سماچار / محمد شہزاد
