سونمورا (تریپورہ)، 16 اپریل (ہ س)۔ تریپورہ قبائلی علاقہ جات خود مختار ضلع کونسل (ٹی ٹی اے اے ڈی سی ) کے انتخابات کے لیے ووٹنگ کے دن سپاہی جلا ضلع کے باکس نگر کے ایک پولنگ اسٹیشن کے ارد گرد بھڑکنے والے تشدد کے سلسلے میں بی جے پی ایم ایل اے تفضل حسین اور دیگر 35 افراد کے خلاف قلم چورا پولیس اسٹیشن میں ایف آئی آر درج کی گئی ہے۔ یہ شکایت ٹپرا موتھا دل کے رکن ابھیرام دیب برما نے درج کروائی ہے، جو اس وقت بشرام گنج اسپتال میں زیر علاج ہیں۔

شکایت کنندہ کا دعویٰ ہے کہ واقعہ کے دن ایم ایل اے تفضل حسین تقریباً 200 حامیوں کے ساتھ اچانک پولنگ اسٹیشن پہنچے۔ اس سے کشیدگی بڑھ گئی اور صورت حال تیزی سے بگڑ گئی۔ایف آئی آر میں کہا گیا ہے کہ اس وقت پولنگ اسٹیشن کے قریب بم پھینکا گیا تھا۔ ٹپرا موتھا ممبر نے الزام لگایا کہ حملہ منصوبہ بند تھا اور اس کا مقصد ووٹنگ کے عمل میں خلل ڈالنا تھا۔ الزام ہے کہ پولیس نے موقع پر پہنچ کر حالات کو قابو میں کیا تو ملزمان فرار ہو گئے۔

انتظامی ذرائع کے مطابق واقعے کے بعد علاقے میں اضافی سکیورٹی فورسز کو تعینات کردیا گیا ہے۔ صورتحال فی الحال قابو میں ہے۔ تاہم اس واقعے پر سیاسی حلقوں کی جانب سے شدید ردعمل سامنے آیا ہے۔

پولیس ذرائع کے مطابق واقعے کی تفتیش شروع کردی گئی ہے اور ملزمان کی شناخت اور قانونی کارروائی کا عمل جاری ہے۔ انتظامیہ نے یقین دہانی کرائی ہے کہ واقعہ میں ملوث افراد کے خلاف سخت کارروائی کی جائے گی۔

ہندوستھان سماچار

ہندوستان سماچار / محمد شہزاد