ممبئی ، 16 اپریل (ہ س) مہاراشٹر کے تھانے شہر کے ونڈر مال علاقے میں واقع ایک ڈومینوز پیزا اسٹور پر چھاپہ مار کارروائی کرتے ہوئے راشن ڈسٹری بیوشن کنٹرولر کی ٹیم نے غیر قانونی طور پر ذخیرہ کیے گئے 140 گیس سلنڈر ضبط کر لیے ہیں، جن کی مالیت تقریباً 4 لاکھ 59 ہزار 400 روپے بتائی جا رہی ہے۔ اس معاملے میں ایک شخص کو گرفتار بھی کیا گیا ہے۔
محکمہ خوراک کے ترجمان کے مطابق دفتر کو خفیہ اطلاع ملی تھی کہ مذکورہ اسٹور میں غیر قانونی طور پر گیس سلنڈر ذخیرہ کیے جا رہے ہیں۔ اسی اطلاع کی بنیاد پر ٹیم نے کارروائی کرتے ہوئے اسٹور کے بیسمنٹ سے بڑی تعداد میں سلنڈر برآمد کیے۔ ضبط شدہ سلنڈروں میں 55 بھرے ہوئے جبکہ 85 خالی سلنڈر شامل ہیں۔ تمام سلنڈروں کو ضبط کر کے سیل کر دیا گیا ہے۔
حکام کے مطابق اس معاملے میں ایک ملزم کو گرفتار کر کے چتلسر پولیس اسٹیشن کے حوالے کر دیا گیا ہے، جہاں اس کے خلاف ضروری اشیاء ایکٹ 1955 کے تحت مقدمہ درج کیا گیا ہے اور مزید تفتیش جاری ہے۔
محکمہ خوراک کی جانب سے کہا گیا ہے کہ کمرشل مقامات پر گھریلو گیس سلنڈروں کے غلط استعمال اور غیر قانونی ذخیرہ اندوزی کے خلاف سخت کارروائیاں جاری رہیں گی تاکہ ایسے معاملات پر قابو پایا جا سکے۔
ہندوستھان سماچار
--------------------
ہندوستان سماچار / جاوید این اے
