ابتدائی کاروبار میں شیئر بازار میں تیزی، سینسیکس اور نفٹی میں اضافہ

نئی دہلی، 15 اپریل (ہ س)۔ امریکی صدر ڈونالڈ ٹرمپ کی جانب سے مغربی ایشیا کے بحران کو ختم کرنے کے لیے ایران سے دوبارہ بات چیت شروع کرنے کا اشارہ دینے کی وجہ سے پوری دنیا کے بازار کی طرح گھریلو شیئر بازار میں بھی آج جوش و خروش نظر آرہا ہے۔ آج کے کاروبار کی شروعات بھی مضبوطی کے ساتھ ہوئی تھی۔ حالانکہ بازار کھلنے کے بعد منافع وصولی کے باعث سینسیکس اور نفٹی دونوں انڈیکس کی چال میں تھوڑی گراوٹ بھی آئی۔ اس کے باوجود بازار مسلسل زوردار مضبوطی کے ساتھ کاروبار کرتا رہا۔ پہلے ایک گھنٹے کا کاروبار ہونے کے بعد سینسیکس 1.71 فیصد اور نفٹی 1.67 فیصد کی مضبوطی کے ساتھ کاروبار کر رہے تھے۔

ابتدائی ایک گھنٹے کا کاروبار ہونے کے بعد شیئر بازار کے سرکردہ شیئروں میں سے انٹر گلوب ایوی ایشن، ایچ ڈی ایف سی لائف، میکس ہیلتھ کیئر، لارسن اینڈ ٹوبرو اور ٹی سی ایس کے شیئر 4.60 فیصد سے لے کر 3.07 فیصد کی مضبوطی کے ساتھ کاروبار کر رہے تھے۔ دوسری جانب، ڈاکٹر ریڈیز لیبارٹریز، او این جی سی، کول انڈیا اور آئی سی آئی سی آئی بینک کے شیئر 1.38 فیصد سے لے کر 0.21 فیصد کی گراوٹ کے ساتھ کاروبار کرتے ہوئے نظر آرہے تھے۔

ابھی تک کے کاروبار میں شیئر بازار میں 2,829 شیئروں میں ایکٹیو ٹریڈنگ ہو رہی تھی۔ ان میں سے 2,639 شیئر منافع کما کر سبز نشان میں کاروبار کر رہے تھے، جبکہ 190 شیئر نقصان اٹھا کر سرخ نشان میں کاروبار کر رہے تھے۔ اسی طرح سینسیکس میں شامل 30 شیئروں میں سے 29 شیئر خریداری کی حمایت سے سبز نشان میں برقرار تھے۔ دوسری جانب صرف ایک شیئر فروخت کے دباو میں سرخ نشان میں کاروبار کر رہا تھا۔ جبکہ نفٹی میں شامل 50 شیئروں میں سے 46 شیئر سبز نشان میں اور چار شیئر سرخ نشان میں کاروبار کرتے نظر آرہے تھے۔

بامبے اسٹاک ایکسچینج (بی ایس ای) کا سینسیکس آج 1,133.53 پوائنٹس کی مضبوطی کے ساتھ 77,981.10 پوائنٹس کی سطح پر کھلا۔ کاروبار کی شروعات ہوتے ہی یہ انڈیکس تیزی کے ساتھ 78,270.42 پوائنٹس کی سطح پر آگیا۔ اس کے بعد بازار میں منافع وصولی کے سبب سینسیکس کی چال میں گراوٹ بھی آئی۔ فروخت کے دباو میں یہ انڈیکس گر کر 77,849.52 پوائنٹس کی سطح پر پہنچ گیا۔ اس کے بعد خریداروں نے ایک بار پھر خریداری کا زور لگایا، جس سے انڈیکس کی رفتار دوبارہ بڑھنے لگی۔ بازار میں مسلسل جاری خرید و فروخت کے درمیان پہلے ایک گھنٹے کا کاروبار ہونے کے بعد صبح 10.15 بجے سینسیکس 1,313.62 پوائنٹس کے اضافے کے ساتھ 78,161.19 پوائنٹس کی سطح پر کاروبار کر رہا تھا۔

سینسیکس کی طرح ہی این ایس ای کے نفٹی نے آج 321.15 پوائنٹس کی تیزی کے ساتھ 24,163.80 کی سطح سے کاروبار کی شروعات کی۔ بازار کھلتے ہی یہ انڈیکس اوپننگ لیول سے 115 پوائنٹس سے زیادہ کے اضافے کے ساتھ 24,280.90 پوائنٹس تک پہنچ گیا۔ اس کے بعد منافع وصولی شروع ہونے پر نفٹی گر کر 24,145.80 پوائنٹس کی سطح تک آگیا۔ اس کے بعد خریداروں نے ایک بار پھر خریداری کا زور بنایا، جس سے یہ انڈیکس دوبارہ تیزی دکھانے لگا۔ بازار میں مسلسل جاری خرید و فروخت کے درمیان شروعاتی ایک گھنٹے کا کاروبار ہونے کے بعد صبح 10.15 بجے نفٹی 397.65 پوائنٹس کی تیزی کے ساتھ 24,240.30 پوائنٹس کی سطح پر کاروبار کر رہا تھا۔

ہندوستھان سماچار

ہندوستان سماچار / انظر حسن