ایل جی نے جموں میں توی ریور فرنٹ کا افتتاح کیا

جموں، 15 اپریل (ہ س)۔ جموں و کشمیر کے لیفٹیننٹ گورنر منوج سنہا نے بیساکھی کے موقع پر 156 کروڑ روپے کی لاگت سے تیار توی ریور فرنٹ پروجیکٹ (فیز-اوّل) کا افتتاح کر کے اسے عوام کے نام وقف کر دیا۔ حکام کے مطابق پروجیکٹ کے پہلے مرحلے میں دریا کے دونوں کناروں اور مرکزی جزیرے پر واکنگ، جاگنگ اور سائیکلنگ کے لیے راستے تیار کیے گئے ہیں، جبکہ توی آرتی کے لیے خصوصی گھاٹ بھی قائم کیا گیا ہے۔

لیفٹیننٹ گورنر نے تین روزہ توی مہوتسو میں شرکت کے دوران شہریوں کے ساتھ آرتی میں حصہ لیا اور متعدد ترقیاتی منصوبوں کا آغاز کیا۔ اس موقع پر انہوں نے دائیں کنارے کو جوڑنے والی چار لین سڑک اور پل کا سنگِ بنیاد رکھا، جس سے شہر میں ٹریفک کے دباؤ کو کم کرنے میں مدد ملے گی۔

اس کے علاوہ بائیں کنارے پر ایک کلومیٹر طویل گرین اسپیس کی تعمیر بھی شروع کی گئی ہے، جس سے علاقے کو ایک جدید اور پرکشش شہری مقام میں تبدیل کیا جائے گا۔ انہوں نے کہا کہ ریور فرنٹ کو مزید وسعت دینے اور اسے سیاحتی و تفریحی مرکز بنانے کے لیے مختلف اقدامات کیے جا رہے ہیں۔ تقریب کے دوران شہریوں کو منشیات مخالف حلف بھی دلایا گیا اور دنگل کے فاتحین کو انعامات سے نوازا گیا۔

ہندوستھان سماچار

---------------

ہندوستان سماچار / محمد اصغر