جموں, 13 اپریل (ہ س)ضلع رام بن کے رامسو علاقے میں ایک شخص مشتبہ حالات میں لاپتہ ہو گیا، جس کے بعد علاقے میں شدید کشیدگی اور عوامی غصہ دیکھنے کو مل رہا ہے۔

پولیس اور مقامی ذرائع کے مطابق، یہ واقعہ این ایچ-44 پر مکرکوٹ کے قریب پیش آیا، جہاں تنویر احمد چوپان ولد عبدالسلام چوپان سکنی منڈکھل پوگل، تحصیل اُکھڑال، جموں سے اپنے گاؤں واپس جا رہے تھے۔ بتایا جاتا ہے کہ وہ ایک ٹاٹا موبائل گاڑی میں مویشیوں کے ساتھ سفر کر رہے تھے۔

اطلاعات کے مطابق، ڈگڈول کے قریب دو گاڑیوں میں سوار مشتبہ افراد نے ان کا پیچھا کیا۔ مکرکوٹ پہنچنے پر مبینہ طور پر انہیں گاڑی سے اتار کر تشدد کا نشانہ بنایا گیا۔ عینی شاہدین کے مطابق، وہ جان بچانے کی کوشش میں نزدیکی نالہ بشلاری کی طرف بھاگے اور پانی میں کود گئے، جس کے بعد سے وہ لاپتہ ہیں۔

واقعے کے فوراً بعد رامسو پولیس نے ریسکیو آپریشن شروع کیا، جس میں ہمالین کوئک رسپانس ٹیم کے رضاکار بھی شامل ہیں، تاہم تاحال لاپتہ شخص کا کوئی سراغ نہیں مل سکا ہے۔

سینئر حکام بشمول ایم ایل اے بانہال سجاد شاہین، ڈپٹی کمشنر رام بن محمد الیاس خان اور ایس ایس پی رام بن ارون گپتا نے موقع کا دورہ کر کے صورتحال کا جائزہ لیا۔ پولیس نے مقدمہ درج کرنے اور سی سی ٹی وی فوٹیج کی جانچ شروع کر دی ہے۔

ادھر مقامی لوگوں نے واقعے پر شدید برہمی کا اظہار کرتے ہوئے انصاف کا مطالبہ کیا ہے، جبکہ سیاسی و سماجی رہنماؤں نے بھی اس واقعے کی سخت الفاظ میں مذمت کی ہے۔

ایم ایل اے سجاد شاہین نے کہا کہ واقعے کی مکمل تحقیقات کے لیے خصوصی تحقیقاتی ٹیم (ایس آئی ٹی) تشکیل دی جائے گی اور قصورواروں کو بخشا نہیں جائے گا۔

دریں اثنا، بیوپار منڈل بانہال کے صدر انجینئر شاداب وانی نے اس واقعے کے خلاف پیر کو ایک روزہ ہڑتال کا اعلان کیا ہے۔

---------------

ہندوستان سماچار / محمد اصغر