کھنڈوا، 13 اپریل (ہ س)۔ مدھیہ پردیش کے کھنڈوا ریلوے اسٹیشن کے آوٹر پر اتوار کی رات ایل پی جی گیس سے بھری مال گاڑی کے ایک ویگن میں رساو ہونے سے افرا تفری مچ گئی۔ وقت رہتے ریلوے ملازمین کی مستعدی اور انتظامیہ کی فوری کارروائی سے ممکنہ بڑا حادثہ ٹل گیا۔

دراصل مہاراشٹر کے پنویل سے جبل پور (بھیٹونی) جا رہی بھارت پیٹرولیم کی مال گاڑی میں 32 ویگن تھے۔ رات تقریباً 9.30 بجے ٹرین آوٹر پر کھڑی تھی، تبھی اسٹاف کی تبدیلی کے دوران گیس کی تیز بو محسوس کی گئی۔ جانچ میں ایک ویگن سے ایل پی جی گیس کے رساو کی تصدیق ہوئی۔

معلومات کے مطابق، شفٹ ختم ہونے پر ٹریک چیک کر رہے ایک ریلوے ملازم نے پہلے گیس کی آواز اور پھر تیز بو محسوس کی۔ پاس جا کر دیکھنے پر ایک ویگن سے تیزی سے گیس نکلتی دکھائی دی۔ ملازم نے فوراً اسٹیشن مینجمنٹ کو اطلاع دی، جس کے بعد پورے سسٹم کو الرٹ کر دیا گیا۔ اطلاع ملتے ہی ریلوے کے افسران، اسٹیشن منیجر اروند ساہا، آر پی ایف اور پولیس افسران موقع پر پہنچ گئے۔ کلکٹر رشبھ گپتا اور ایس پی منوج کمار رائے نے بھی جائے وقوعہ پر پہنچ کر صورتحال کا جائزہ لیا۔ پورے علاقے کو حفاظتی حصار میں لے لیا گیا اور عام لوگوں کی آمد و رفت روک دی گئی۔

سنگین صورتحال کو دیکھتے ہوئے ریلوے اور ڈیزاسٹر مینجمنٹ ٹیم نے فوری کارروائی شروع کی۔ ریلوے اور انتظامی افسران نے 3 گھنٹے کی مشقت کے بعد لیکیج والے 1 ویگن کو باقی 31 ویگنوں سے علیحدہ کر کے آئسولیٹ (علیحدہ) کر دیا۔ احتیاط کے طور پر لیکیج والے ویگن کو گیلے باردانے (بوریوں) اور گیلی بالو ریت سے ڈھانپ دیا گیا۔ لیکیج ویگن کو الگ کرنے اور صورتحال کو محفوظ بنانے میں انتظامیہ کو تقریباً 3 گھنٹے کا وقت لگا۔ صورتحال کو مکمل طور پر قابو میں کرنے کے لیے صنعتی علاقے پتھم پور سے تکنیکی ماہرین کی ٹیم کو بلایا گیا اور باقی 31 ویگنوں والی ٹرین کو جبل پور روانہ کر کے رات 12.30 بجے کے بعد اس روٹ پر ٹرینوں کی آمد و رفت بحال کر دی گئی ہے۔

رات 12.30 بجے افسران موقع سے روانہ ہوئے۔ اس پورے واقعے کی وجہ سے ریلوے ٹریفک بھی متاثر ہوا اور راجدھانی و منگلا ایکسپریس سمیت کل 6 ٹرینیں متاثر رہیں۔ کئی ٹرینوں کو آوٹر اور قریبی اسٹیشنوں پر روکنا پڑا۔ تقریباً رات 12.30 بجے صورتحال قابو میں آنے کے بعد ٹرینوں کی آمد و رفت بحال کی گئی۔

موقع پر پہنچے کلکٹر رشبھ گپتا نے بتایا کہ، ’’32 ویگنوں والی ٹرین میں ایل پی جی گیس بھری ہوئی تھی۔ ایک ویگن میں لیکیج پایا گیا، جسے علیحدہ کر کے ابتدائی طبی امداد (فرسٹ ایڈ) کے طور پر گیلی بوریوں سے ڈھانپا گیا ہے۔ صنعتی علاقے پتھم پور سے ٹیکنیکل ٹیم کو بلایا گیا ہے، ٹیم وہاں سے روانہ ہو گئی ہے۔ ایک ویگن میں اتنی گیس بھری رہتی ہے کہ اگر حادثہ ہوتا تو پورا شہر دہل سکتا تھا۔‘‘

ہندوستھان سماچار

---------------

ہندوستان سماچار / انظر حسن