جموں, 12 اپریل (ہ س)جموں کے اکھنور علاقے میں ہفتہ کی شام ایک غیر معمولی موسمی واقعہ پیش آیا جب اچانک طوفانی بگولہ (ٹورنیڈو) نمودار ہوا، جس سے مقامی باشندوں میں خوف و ہراس پھیل گیا۔محکمہ موسمیات جموں و کشمیر کے ڈائریکٹر ڈاکٹر مختار احمد نے اس واقعے کی تصدیق کرتے ہوئے بتایا کہ یہ نایاب مظہر تقریباً 10 منٹ تک ایک کھلے میدان میں جاری رہا۔ مقامی پولیس حکام کے مطابق اس واقعے سے کسی جانی یا مالی نقصان کی اطلاع نہیں ملی۔

عینی شاہدین کے مطابق تیز گھومتی ہواؤں کے ستون نے گرد و غبار اور ہلکے ملبے کو فضا میں بلند کر دیا، جسے دیکھ کر لوگ گھبرا گئے اور محفوظ مقامات کی طرف دوڑ پڑے۔ کئی افراد نے اسے اپنی زندگی کا پہلا ایسا تجربہ قرار دیا۔

سوشل میڈیا پر مقامی لوگوں کی جانب سے شیئر کی گئی ویڈیوز میں اس بگولے کو واضح طور پر دیکھا جا سکتا ہے، جہاں صارفین نے تشویش کا اظہار کرتے ہوئے دعائیں بھی کیں۔

ڈاکٹر مختار احمد نے کہا کہ یہ خطے کے لیے ایک انتہائی نادر واقعہ ہے، اگرچہ گزشتہ سال پنجاب کے مختلف علاقوں میں ایسے واقعات دیکھے گئے تھے۔ ان کے مطابق یہ طوفان دراصل گرج چمک کے بادلوں سے بننے والی تیز ہواؤں کی ایک لائن (اسکوال لائن) سے شروع ہوا جو تیزی سے ٹورنیڈو میں تبدیل ہو گئی۔

حکام نے بتایا کہ دن کے آغاز میں موسم صاف تھا، تاہم شام تقریباً 4 بجکر 45 منٹ پر اچانک سیاہ بادل چھا گئے، جس کے بعد مختلف مقامات پر درمیانی درجے کی بارش اور گرج چمک کا سلسلہ شروع ہو گیا۔

بارش کے تھمنے کے بعد شہر کی فضا میں قوسِ قزح بھی دیکھی گئی، جس نے منظر کو مزید دلکش بنا دیا۔

ہندوستھان سماچار

---------------

ہندوستان سماچار / محمد اصغر