بھوپال، 10 اپریل (ہ س)۔ مدھیہ پردیش میں اپریل کی شروعات اس بار شدید گرمی کے بجائے آندھی، بارش اور ژالہ باری کے ساتھ ہوئی۔ یکم سے 9 اپریل کے درمیان ریاست کے مختلف حصوں میں مسلسل موسم بدلتا رہا۔ تاہم اب یہ دور تھمنے جا رہا ہے۔ آج جمعہ سے ریاست میں گرمی کا اثر تیز ہونے لگے گا، جس کے باعث دن کے درجہ حرارت میں 4 سے 6 ڈگری تک اضافہ ہو سکتا ہے۔

دراصل اپریل کے ابتدائی دنوں میں ریاست میں مضبوط موسمی نظام فعال رہے۔ جمعرات کو بھی گردابی گردش کے باعث مشرقی مدھیہ پردیش کے کئی اضلاع امریا، شہڈول، ڈنڈوری، انوپ پور، منڈلا، سیونی اور بالا گھاٹ میں موسم تبدیل رہا۔ کہیں تیز آندھی چلی تو کہیں ہلکی بارش درج کی گئی۔ محکمہ موسمیات کا کہنا ہے کہ جمعہ سے ان سسٹمز کا اثر ختم ہو جائے گا۔ اگلے پانچ دنوں تک ریاست میں بارش کا کوئی امکان نہیں ہے۔ اس دوران موسم خشک رہے گا اور درجہ حرارت مسلسل بڑھے گا۔ 15 اپریل 2026 کو شمال مغربی علاقوں میں ایک نیا مغربی ڈسٹربنس (ویسٹرن ڈسٹربنس) فعال ہو سکتا ہے، لیکن اس کا اثر مدھیہ پردیش میں بہت زیادہ دیکھنے کو نہیں ملے گا۔

قابلِ ذکر ہے کہ گرمی کے لحاظ سے اپریل اور مئی سب سے اہم مہینے مانے جاتے ہیں۔ عام طور پر مارچ کے آخر سے درجہ حرارت تیزی سے بڑھنے لگتا ہے، لیکن اس بار مغربی ڈسٹربنس اور سائکلونک سرکلشین کے باعث درجہ حرارت میں گراوٹ دیکھنے کو ملی۔ اپریل کے پہلے پندرہ دنوں میں بھی ریاست میں بارش، ژالہ باری اور آندھی کا سلسلہ جاری رہا، جس سے گزشتہ کئی دنوں سے موسم خوشگوار بنا ہوا تھا۔

ہندوستھان سماچار

---------------

ہندوستان سماچار / انظر حسن