نوی ممبئی میں سائرن گونجے، فضائی حملہ اور بلیک آؤٹ کی عملی مشقتھانے، 10 اپریل (ہ س)۔ نوی ممبئی کے کوپرکھیرنے علاقے میں ایک سنسنی خیز ’فضائی حملہ اور بلیک آؤٹ مَاک ڈرل‘ کا انعقاد کیا گیا، جس میں ہنگامی حالات میں خود اور معاشرے کے تحفظ کے عملی طریقے پیش کیے گئے۔ یہ مشق نئی دہلی میں واقع محکمۂ شہری دفاع کے احکامات کے تحت، مہاراشٹر ریاستی شہری دفاع نظام کے تعاون سے، نوی ممبئی گروپ اور ٹھانے دفتر کی جانب سے منعقد کی گئی۔ یہ مَاک ڈرل کوپرکھیرنے سیکٹر 11 میں واقع گنپت شیٹھ فقیرجی نائک میدان میں دوپہر 4 بج کر 55 منٹ پر شروع ہوئی، جس کی قیادت شہری دفاع کے نائب کنٹرولر وجے جادھو نے کی۔ اس موقع پر تھانے ضلع کے چیف ایریا وارڈن اور رکن اسمبلی سنجے کیڑکر اور مقامی کارپوریٹر بھارتی پاٹل مہمانِ خصوصی کے طور پر موجود تھیں۔

پروگرام کا آغاز قومی ترانے سے ہوا، جس کے بعد شہری دفاع کے جوانوں نے فضائی حملے کے دوران کیے جانے والے اقدامات، زخمیوں کو ابتدائی طبی امداد، آگ پر قابو پانے کے لیے فائر بریگیڈ کی مشقیں، ملبے تلے دبے افراد کی ریسکیو کارروائیاں اور بلند عمارتوں سے ’ہائی رائز ریسکیو‘ کے منظم مظاہرے پیش کیے۔ اس مَاک ڈرل میں شہری دفاع کے 154 رضاکار اور اعزازی افسران، 50 ہوم گارڈ جوان، نوی ممبئی میونسپل کارپوریشن کے ملازمین، محکمۂ صحت کی ایمبولینس ٹیم، کوپرکھیرنے، واشی، کلیان-ڈومبیولی اور الہاس نگر میونسپل کارپوریشن کے فائر بریگیڈ یونٹس، پولیس بی ڈی ڈی ایس ٹیم، مقامی پولیس، ٹی ڈی آر ایف ٹیم، محکمۂ آفات انتظامیہ کے اہلکار، پی ایم شری اسکول کے 1835 طلبہ و عملہ اور تقریباً 2500 مقامی شہری شریک ہوئے۔

مرکزی مشق سے قبل ٹھاکرلی کے ماتربین کاشی بائی پاٹل کالج کے رضاکاروں نے ایک مؤثر اسٹریٹ پلے پیش کیا، جس میں شہری دفاع کی تربیت کی اہمیت کو اجاگر کیا گیا۔ شام 7 بجے بلیک آؤٹ مہم کے تحت علاقے کی تلشی درشن سوسائٹی (اے اور بی ونگ) میں روشنی بند کر کے یہ دکھایا گیا کہ جنگی حالات میں اندھیرے کا استعمال کرتے ہوئے دشمن کو کس طرح گمراہ کیا جا سکتا ہے۔

رکن اسمبلی سنجے کیڑکر نے تمام ٹیموں کی کارکردگی کو سراہتے ہوئے کہا کہ اس طرح کی مشقیں شہریوں میں اعتماد پیدا کرتی ہیں۔ اس مَاک ڈرل کی کامیابی میں نوی ممبئی میونسپل کارپوریشن کے محکمۂ آفات انتظامیہ کا اہم تعاون حاصل رہا۔ آخر میں نائب کنٹرولر وجے جادھو نے تمام افسران، ملازمین اور رضاکاروں کا شکریہ ادا کیا، جبکہ پروگرام کا اختتام ’وندے ماترم‘ کے ساتھ کیا گیا۔

ہندوستھان سماچار

--------------------

ہندوستان سماچار / جاوید این اے