نئی دہلی، 7 مارچ (ہ س)۔ احمد آباد میں اتوار کو ہونے والے ٹی20- ورلڈ کپ کرکٹ فائنل کے پیش نظر، انڈین ریلویز نے شائقین کی سہولت کے لیے نئی دہلی اور سابرمتی کے درمیان ایک خصوصی ٹرین چلانے کا فیصلہ کیا ہے۔ یہ فیصلہ ہوائی جہاز کے کرایوں میں اضافے اور ٹکٹوں کی محدود دستیابی کے باعث کیا گیا، تاکہ میچ میں شرکت کرنے والوں کو سفری مشکلات کا سامنا نہ کرنا پڑے۔

ریلوے حکام کے مطابق ،خصوصی ٹرین نمبر 04062 نئی دہلی ریلوے اسٹیشن سے ہفتہ کی رات 11 بجکر 45 منٹ پر روانہ ہوگی۔ ٹرین دہلی کینٹ، گروگرام اور جے پور جیسے بڑے اسٹیشنوں پر رکے گی اور اتوار کو دوپہر 2:30 بجے سابرمتی پہنچے گی۔ اس خصوصی ٹرین میں کل 19 ڈبے لگائے گئے ہیں۔ ان میں مسافروں کی سہولت کے لئے اے سی -3 اور اے سی -2 کلاس کوچز شامل ہیں، جو طویل فاصلے تک سفر کرنے والے زائرین کے لیے آرام دہ سفر کو یقینی بناتے ہیں۔

حکام کا کہنا ہے کہ ہندوستان بمقابلہ نیوزی لینڈ ٹی20 ورلڈ کپ 2026 کے فائنل کے لیے ملک بھر کے کرکٹ شائقین میں زبردست جوش و خروش پایا جاتا ہے اور لوگوں کی بڑی تعداد احمد آباد کے نریندر مودی اسٹیڈیم پہنچنے کا منصوبہ بنا رہی ہے۔ یہ خصوصی ٹرین اضافی بھیڑ سے نمٹنے اور سفر کی سہولت کے لیے چلائی جا رہی ہے۔

ریلوے نے مسافروں سے اپیل کی ہے کہ وہ اپنے سفر سے پہلے ریلوے کی سرکاری ویب سائٹ یا مجاز پلیٹ فارم سے ٹکٹ کی دستیابی اور اوقات کے بارے میں معلومات حاصل کریں، تاکہ انہیں کسی قسم کی تکلیف کا سامنا نہ کرنا پڑے۔

ہندوستھان سماچار

ہندوستان سماچار / محمد شہزاد