رباط، 6 مارچ (ہ س)۔ مراکش کی قومی فٹ بال ٹیم کے ہیڈ کوچ ولید الرکراکی نے جمعرات کو اپنے عہدے سے استعفیٰ دے دیا۔یہ فیصلہ انہوں نے 2026 فیفا ورلڈ کپ سے چند ماہ قبل لیا۔ گزشتہ کئی ہفتوں سے ان کے مستقبل کے بارے میں قیاس آرائیوں کا دور جاری تھا، جس کے بعد انہوں نے عہدے سے سبکدوش ہونے کا فیصلہ کیا۔ الرکراکی نے اپنے استعفیٰ کی وجہ تھکاوٹ کو بتایا ہے ۔

50 سالہ الرکراکی نے مراکش کو 2022 فیفا ورلڈ کپ میں تاریخی سیمی فائنل تک پہنچایا، جو کسی بھی افریقی ملک کی جانب سے ورلڈ کپ کی بہترین کارکردگی ہے۔ اس سال جنوری میں انہوں نے افریقہ کپ آف نیشنز کے فائنل میں بھی ٹیم کی قیادت کی تھی جہاں مراکش کو سینیگال سے شکست کا سامنا کرنا پڑا تھا۔

میڈیا رپورٹس کے مطابق، محمد اوہبی اب مراکش کی ٹیم کی قیادت کر سکتے ہیں۔ انہوں نے گزشتہ سال چلی میں ہونے والے انڈر 20 ورلڈ کپ میں مراکش کی فتح میں اہم کردار ادا کیا تھا۔ستمبر 2022 میں کوچ کا عہدہ سنبھالنے کے بعد سے الرکراکی کا شاندار ریکارڈ رہا ہے۔ ان کے دور میں مراکش نے 49 میں سے 36 میچ جیتے، 8 ڈرا ہوئے اور صرف 5 میں شکست ہوئی۔ اس عرصے کے دوران، ٹیم نے جون 2024 سے دسمبر 2024 کے درمیان مسلسل 19 فتوحات حاصل کرکے قومی ٹیموں کے درمیان مسلسل 19 فتوحات کا عالمی ریکارڈ بھی بنایا۔

الرکراکی مبینہ طور پر جنوری میں نیشنز کپ کے فائنل میں شکست کے بعد مستعفی ہونا چاہتے تھے۔ تقریباً چار سال ٹیم کے انچارج رہنے کے بعد وہ ذہنی اور جسمانی طور پر کافی تھک چکے تھے۔ تاہم، مراکش فٹ بال ایسوسی ایشن نے ان سے نئے کوچ کے انتخاب تک اس عہدے پر رہنے کی درخواست کی۔

مراکش اس ماہ دو بین الاقوامی دوستانہ میچ کھیلے گا۔ ان کا مقابلہ 27 مارچ کو میڈرڈ میں ایکواڈور اور چار دن بعد فرانس کے شہر لینس میں پیراگوئے سے ہوگا۔

مراکش کو آئندہ فیفا ورلڈ کپ 2026 میں برازیل، اسکاٹ لینڈ اور ہیتی کے ساتھ گروپ سی میں رکھا گیا ہے۔

مراکش کے کپتان اشرف حکیمی نے سوشل میڈیا پر الرکراکی کا شکریہ ادا کرتے ہوئے کہا کہ ان کی قیادت، جذبہ اور وژن نے کھلاڑیوں کے ساتھ ساتھ ملک اور دنیا کے شائقین کو بھی متاثر کیا۔

ہندوستھان سماچار

ہندوستان سماچار / محمد شہزاد