وزیراعظم مودی کی کولکاتا ریلی 15 کے بجائے 14 مارچ کو، بی جے پی امیدواروں کی فہرست پر کام تیز

کولکاتا، 06 مارچ (ہ س)۔ مغربی بنگال میں اسمبلی انتخابات کی تیاری کے درمیان بھارتیہ جنتا پارٹی کی کولکاتا میں مجوزہ بڑی ریلی کی تاریخ بدل سکتی ہے۔ وزیراعظم نریندر مودی کی یہ ریلی پہلے 15 مارچ کو طے تھی، لیکن اب اسے ایک دن پہلے یعنی 14 مارچ کو منعقد کیے جانے کا امکان ظاہر کیا جا رہا ہے۔

بی جے پی کی ریاستی کمیٹی کے ایک رکن کے مطابق، وزیراعظم دفتر کے پروگرام میں ممکنہ تبدیلی کی وجہ سے ریلی کی تاریخ میں تبدیلی کی جا سکتی ہے۔ نئے مجوزہ پروگرام کے مطابق وزیراعظم مودی 13 مارچ کی رات کولکاتا پہنچ سکتے ہیں اور 14 مارچ کی دوپہر میں ریلی سے خطاب کرنے کے بعد اسی دن دہلی لوٹ سکتے ہیں۔

کولکاتا کے بریگیڈ پریڈ میدان میں ہونے والی یہ ریلی بی جے پی کی ’پریورتن یاترا‘ کے اختتامی پروگرام کے طور پر ہوگی۔ یہ یاترا 2 مارچ سے شروع ہوئی ہے۔ پریورتن یاترا کے مختلف مراحل میں مرکزی وزیر داخلہ امت شاہ، وزیر دفاع راج ناتھ سنگھ اور مرکزی وزیر جے پی نڈا سمیت کئی سینئر لیڈر شامل ہو چکے ہیں۔

اس دوران مغربی بنگال میں 294 اسمبلی نشستوں کے لیے پارٹی امیدواروں کے انتخاب کا عمل بھی تیز کر دیا گیا ہے۔ ریاستی اکائی ممکنہ امیدواروں کے ناموں کی سفارش مرکزی قیادت کو بھیجنے کی تیاری کر رہی ہے۔

پارٹی ذرائع کے مطابق اس بار ہر اسمبلی حلقے کے لیے دو الگ الگ فہرستیں تیار کی جا رہی ہیں۔ پہلی فہرست میں تین پسندیدہ امیدواروں کے نام ہوں گے، جبکہ دوسری فہرست میں تین ایسے نام شامل کیے جائیں گے جنہیں امیدوار کے طور پر ترجیح نہیں دی جا رہی ہے۔

ہندوستھان سماچار

---------------

ہندوستان سماچار / انظر حسن