کویتا نے تروملا میں پوجا کی، ایک نئی سیاسی پارٹی بنانے کا دیا اشارہ

حیدرآباد، 06 مارچ (ہ س)۔ تلنگانہ جاگرُتی صدر کلواکنتلا کویتا نے جمعہ کی صبح تیروملا وینکٹیشورا مندر میں بھگوان وینکٹیشورا سوامی کی پوجا اور درشن کیے۔ کویتا اپنے شوہر انل کے ساتھ صبح مندرپہنچیں اور بھگوان کے درشن کیے۔

وہ جمعرات کی شام علی پیری کی سیڑھیوں سے پیدل چل کر تیروملا پہنچی تھیں تاکہ اپنی ایک منت پوری کر سکیں۔ درشن کے بعد میڈیا سے گفتگو کرتے ہوئے انہوں نے کہا کہ گزشتہ چار برسوں سے وہ جس ذہنی اذیت سے گزر رہی تھیں، وہ بھگوان وینکٹیشورا کی کرپا سے ختم ہوگئی ہے۔

انہوں نے کہا کہ وہ ہمیشہ کہتی آئی ہیں کہ سچائی، انصاف اور نیکی ان کے ساتھ ہیں اور انہیں خوشی ہے کہ عدالت نے انہیں دہلی آبکاری پالیسی معاملے میں مکمل طور پر بری کردیا ہے۔ کویتا نے اس بات کا بھی اشارہ دیا کہ وہ جلد ہی تلنگانہ کے لوگوں کی امیدوں کو پورا کرنے کے لیے ایک نئی سیاسی جماعت بنانے کا ارادہ رکھتی ہیں۔ انہوں نے کہا کہ آنے والے دنوں میں وہ ایک ایسی پارٹی بنانے کی منصوبہ بندی کر رہی ہیں جو ریاست کے عوام کے لیے تلنگانہ کی اپنی پارٹی کے طور پر کام کرے۔

ہندوستھان سماچار

ہندوستان سماچار / محمدعبدالخالق