بھوپال میں آوارہ کتوں کو لے کر رہائشیوں کا غصہ پھوٹ پڑا، کروند کی میپل ٹری سوسائٹی میں دیر رات احتجاج

بھوپال، 06 مارچ (ہ س)۔ مدھیہ پردیش کے دارالحکومت بھوپال میں جیل روڈ کروند پر واقع میپل ٹری سوسائٹی میں جمعرات کی دیر رات آوارہ کتوں کے مسئلے کو لے کر رہائشیوں کا غصہ پھوٹ پڑا۔ بڑی تعداد میں لوگ سوسائٹی کے گیٹ پر جمع ہو گئے اور میونسپل کارپوریشن اور ڈاگ لورز کے خلاف احتجاج کیا۔ صورتحال کو دیکھتے ہوئے پولیس موقع پر پہنچی اور لوگوں کو سمجھا بجھا کر پرسکون کیا۔

احتجاج جمعرات کی رات تقریباً 11 بجے کے بعد شروع ہوا اور دیر رات تک جاری رہا۔ رہائشیوں کا کہنا ہے کہ سوسائٹی میں آوارہ کتوں کی تعداد مسلسل بڑھ رہی ہے۔ آس پاس کے علاقوں سے بھی بڑی تعداد میں کتے یہاں آ گئے ہیں، جس سے کاٹنے کے واقعات بڑھتے جا رہے ہیں۔ حال ہی میں کچھ بزرگوں اور بچوں کو بھی کتوں نے کاٹ لیا، جس سے کالونی میں خوف کا ماحول ہے۔

رہائشیوں کے مطابق انہوں نے کئی بار میونسپل کارپوریشن میں شکایت کی، لیکن اب تک کوئی ٹھوس کارروائی نہیں ہوئی۔ ان کا الزام ہے کہ شکایت کرنے پر کچھ ڈاگ لورز ان کے خلاف تھانے میں جھوٹی شکایتیں درج کرا رہے ہیں۔ مشتعل لوگوں نے سوسائٹی کے گیٹ پر بیٹھ کر نعرے بازی کی اور انتظامیہ کے خلاف احتجاج کیا۔ ان کا کہنا ہے کہ کئی مہینوں سے کالونی کے لوگ اس مسئلے سے پریشان ہیں۔ آوارہ کتے راہ چلتے لوگوں پر حملہ کر رہے ہیں، جس سے سب سے زیادہ بزرگ اور بچے خوفزدہ ہیں۔

رہائشیوں کا یہ بھی الزام ہے کہ بار بار شکایت کرنے کے باوجود انتظامیہ اور میونسپل کارپوریشن ڈاگ لورز کے دباو کی وجہ سے کارروائی نہیں کر رہے۔ پولیس نے موقع پر پہنچ کر لوگوں سے بات چیت کی اور مسئلے کے حل کے لیے 5 دن کا وقت مانگا ہے۔ رہائشیوں نے وارننگ دی ہے کہ اگر مقررہ وقت میں آوارہ کتوں کے مسئلے کا حل نہ ہوا تو وہ سڑک بلاک کر کے شدید احتجاج کریں گے۔

ہندوستھان سماچار

---------------

ہندوستان سماچار / انظر حسن