وکست بھارت کے وژن میں جموں و کشمیر کلیدی کردار ادا کر سکتا ہے۔ ڈاکٹر جتیندر سنگھ

جموں، 04 مارچ (ہ س)۔ مرکزی حکومت میں وزیر مملکت ڈاکٹر جتیندر سنگھ نے کہا ہے کہ جموں و کشمیر ’وکست بھارت‘ کے وژن میں کلیدی کردار ادا کر سکتا ہے اور مرکز کے ساتھ قریبی شراکت داری کے ذریعے ملک کی ترقی کی رفتار کو مزید تیز کیا جا سکتا ہے۔ وہ یہاں منعقدہ وکست بھارت کانفرنس سے خطاب کر رہے تھے، جس میں عمر عبداللہ، چیف سکریٹری اٹل ڈلو، مرکزی سکریٹری پرسنل رچنا شاہ اور دیگر اعلیٰ حکام موجود تھے۔

مرکزی وزیر مملکت نے کہا کہ محکمہ اصلاحاتِ انتظامیہ نے جموں و کشمیر میں ای۔آفس نظام کے نفاذ میں مدد فراہم کی، جس سے دربار موو کے دوران جموں اور سری نگر کے درمیان سرکاری فائلوں کی نقل و حمل پر آنے والے کروڑوں روپے کے اخراجات کی بچت ممکن ہوئی۔ انہوں نے بتایا کہ حکومت زیادہ سے زیادہ ٹیکنالوجی کے استعمال اور کم سے کم انسانی مداخلت کے ذریعے شفاف اور مؤثر نظامِ حکمرانی کو فروغ دے رہی ہے۔

انہوں نے کہا کہ مرکز نے شکایات کے ازالے کے نظام کو مضبوط بنایا ہے اور بیشتر شکایات ایک ہفتے کے اندر نمٹا دی جاتی ہیں۔ مشن کرم یوگی کے تحت جموں و کشمیر کے تقریباً 3.6 لاکھ سرکاری ملازمین کو آئی جی او ٹی پلیٹ فارم پر مسلسل تربیت فراہم کرنے کا منصوبہ ہے، جبکہ جے کے آئی گرام نظام میں مصنوعی ذہانت کو بھی شامل کیا جا رہا ہے۔

ڈاکٹر جتیندر سنگھ نے مزید کہا کہ گزشتہ برسوں میں متعدد پرانے قوانین ختم کیے گئے، پنشن اصلاحات نافذ کی گئیں اور آن لائن آر ٹی آئی سمیت کئی اقدامات سے نظام میں شفافیت اور کارکردگی میں بہتری آئی ہے۔ کانفرنس میں اضلاع کی ہمہ جہتی ترقی، بہترین طریقۂ کار کے تبادلے اور مربوط و پائیدار ترقی پر زور دیا گیا۔

ہندوستھان سماچار

---------------

ہندوستان سماچار / محمد اصغر