نئی دہلی، 4 مارچ (ہ س)۔

وزیر خارجہ ایس جے شنکر نے منگل کو میانمار کے ینگون میں سرسو بیک مین ادبی مرکز کی عمارت کا افتتاح کیا۔ یہ ایک پروجیکٹ ہے جسے حکومت ہند کے تعاون سے بنایا گیا ہے۔ انہوں نے کہا کہ یہ مرکز ہندوستان اور میانمار کے قریبی تعلقات کی علامت ہے اور میانمار کے ادبی ورثے اور تخلیقی تحریر کے تحفظ کو فروغ دے گا۔

جے شنکر نے کہا کہ ہندوستان اور میانمار کے تعلقات صدیوں پرانے ہیں۔ روحانیت، زبان، ادب اور جغرافیائی قربت دونوں ملکوں کو جوڑتی ہے۔ بدھ مت اور پالی زبان کے ذریعے مشترکہ فکری ورثے کا تبادلہ ہوا۔ ہندوستانی متون کے برمی تراجم جیسے رامائن، بھگو د گیتا، اور تروکورل میانمار میں مقبول رہے ہیں۔ انہوں نے کہا کہ یہ مرکز کلاسیکی اور لوک ادب کے تحفظ، ترجمہ، دستاویزی اور تحقیقی سرگرمیوں کی حوصلہ افزائی کرے گا۔ اس سے نئی نسلوں کو اپنے ثقافتی ورثے سے جڑنے کا موقع ملے گا۔

وزیر خارجہ نے کہا کہ میانمار ہندوستان کی ہند-بحرالکاہل ترجیحات کے سنگم پر واقع ہے، جس میں پڑوسی فرسٹ، ایکٹ ایسٹ اور اوشین شامل ہیں۔ دونوں ممالک کے درمیان سیاسی، تجارتی، سلامتی اور ثقافتی تعاون مسلسل بڑھ رہا ہے۔

کنیکٹیوٹی پروجیکٹوں کا ذکر کرتے ہوئے، انہوں نے کالادان ملٹی موڈل ٹرانزٹ ٹرانسپورٹ پروجیکٹ اور انڈیا-میانمار-تھائی لینڈ سہ فریقی ہائی وے کو کلیدی اقدامات کے طور پر بیان کیا۔ انہوں نے کہا کہ ان منصوبوں کی بروقت تکمیل سے علاقائی ترقی اور عوام کے درمیان رابطوں کو فروغ ملے گا۔

جے شنکر نے نوٹ کیا کہ ہندوستان نے آفات کے دوران میانمار کی مدد کی ہے۔ مارچ 2025 میں منڈالے کے زلزلے کے بعد، آپریشن برہما کے تحت، بھارت نے تقریباً 1,000 ٹن امدادی سامان بھیجا، 80 رکنی تلاش اور بچاو¿ ٹیم کو تعینات کیا، اور ایک فیلڈ ہسپتال قائم کیا، جس میں 2500 سے زیادہ مریضوں کا علاج کیا گیا۔

انہوں نے کہا کہ ہندوستان میانمار کے امن عمل کی حمایت کرتا ہے اور وفاقیت اور آئینی انتظامات پر اپنے تجربات کا اشتراک کرتا رہا ہے۔ ہندوستان میانمار کی زیر قیادت امن عمل کی حمایت کرتا ہے۔

یہ بات قابل ذکر ہے کہ سرسوبیک مین میانمار کی ایک سرکردہ ادبی تنظیم ہے، جس کا مقصد ملک کے ادبی ورثے کا تحفظ اورفروغ دینا ہے۔

ہندوستھان سماچار

ہندوستان سماچار / عطاءاللہ