بہرام پور، 28 مارچ (ہ س)۔ مغربی بنگال کے مرشد آباد ضلع کے جنگی پور میں رام نومی کے جلوس کے دوران جمعہ کی شام کو بھڑکنے والے تشدد کے سلسلے میں پولیس نے ہفتہ کی صبح تک آٹھ لوگوں کو گرفتار کیا ہے۔ رگھوناتھ گنج میں دفعہ 144 نافذ کر دی گئی ہے اور انتظامیہ نے متاثرہ علاقوں میں سکیورٹی سخت کر دی ہے۔پولیس کے مطابق، جنگی پور اور رگھوناتھ گنج کے علاقوں میں جمعہ کو رام نومی کے جلوس کے دوران دو گروپوں کے درمیان جھگڑا ہوا۔ دونوں طرف سے پتھراو¿ کے ساتھ صورتحال تیزی سے تشدد کی شکل اختیار کر گئی۔ کئی دکانوں اور املاک کو توڑ پھوڑ کا نشانہ بنایا گیا اور آتشزدگی کے کچھ واقعات بھی رپورٹ ہوئے۔اطلاعات کے مطابق رگھوناتھ گنج میں میکنزی پارک کی طرف نکلنے والے جلوس کے دوران موسیقی بجانے کو لے کر سستالا علاقے میں مارچ کرنے والوں اور مقامی باشندوں کے درمیان جھگڑا ہوا۔ پھولتلہ موڑ کے قریب پتھراو¿ بھی ہوا، جہاں مبینہ طور پر 150 سے 200 لوگوں کے ہجوم نے جلوس کو نشانہ بنایا۔جیسے ہی صورتحال بگڑ گئی، مشتعل ہجوم نے توڑ پھوڑ کی اور کئی قریبی پھلوں کی دکانوں کو آگ لگا دی، جس سے علاقے میں مزید کشیدگی بڑھ گئی۔واقعہ کے بعد بڑی تعداد میں پولیس اور مرکزی فورسز کو تعینات کر دیا گیا۔ ہفتہ کی صبح سے ہی حساس علاقوں میں مسلسل گشت جاری ہے اور امن برقرار رکھنے کے لیے روٹ مارچ کیا گیا ہے۔ پولیس حکام کا کہنا ہے کہ صورتحال فی الحال قابو میں ہے۔مرشد آباد کے ڈی آئی جی اجیت سنگھ یادو نے کہا کہ صورتحال اب پوری طرح قابو میں ہے۔ علاقے میں مناسب پولیس اور ریپڈ ایکشن فورس (آر اے ایف) فورس کو تعینات کیا گیا ہے۔ تشدد میں ملوث افراد کے خلاف سخت کارروائی کی جا رہی ہے، گرفتاریاں بھی کی گئی ہیں۔ایک اور سینئر پولیس افسر نے بتایا کہ متاثرہ علاقوں کی مسلسل نگرانی کی جارہی ہے۔ امن و امان کو برقرار رکھنے کے لیے پولیس کا گشت جاری ہے۔ تشدد میں ملوث کسی کو بھی نہیں بخشا جائے گا۔انتظامیہ نے رگھوناتھ گنج اور جنگی پور پولیس ضلع کے کچھ دوسرے علاقوں میں ہندوستانی سول سیکورٹی کوڈ کی دفعات کے تحت دفعہ 144 نافذ کر دی ہے، جس میں چار یا زیادہ لوگوں کے جمع ہونے پر پابندی ہے۔اس واقعے پر سیاسی ردعمل بھی سامنے آیا ہے۔ بھارتیہ جنتا پارٹی (بی جے پی) کے رہنما دھننجے گھوش نے الزام لگایا کہ تشدد پہلے سے طے شدہ تھا اور مجرموں کو سخت سے سخت سزا ملنی چاہیے۔دریں اثنا جنگی پور میونسپلٹی کے چیئرمین مفضل الاسلام نے کہا کہ ایسے واقعات کسی بھی صورت میں ناقابل قبول ہیں۔ انتظامیہ مجرموں کے خلاف سخت کارروائی کرے اور قیام امن کو یقینی بنائے۔انتظامیہ نے مقامی باشندوں سے امن برقرار رکھنے اور افواہوں کو نظر انداز کرنے کی اپیل کی ہے۔ حکام کا کہنا ہے کہ ضلع بھر میں سکیورٹی بڑھا دی گئی ہے اور صورتحال پر گہری نظر رکھی جا رہی ہے۔ہندوستھان سماچار

ہندوستان سماچار / Mohammad Khan