کاٹھمنڈو، 27 مارچ (ہ س) راشڑتیہ سواتنتر پارٹی کی پارلیمانی پارٹی کے لیڈر بالیندر شاہ (بیلن) نے جمعہ کو وزیر اعظم کے عہدہ کا حلف لیا۔ صدر رام چندر پاڈیل نے شیتل نواس میں منعقدہ ایک خصوصی تقریب میں 36 سالہ بیلن کو عہدے اور رازداری کا حلف دلایا۔

قبل ازیں صدر پوڈیل نے شاہ کو آئین کے آرٹیکل 76(1) کے مطابق ایوان نمائندگان میں اکثریتی پارٹی کا لیڈر مقرر کیا تھا۔ نیپال کے آئین 2015 (2072) کے نافذ ہونے کے بعد یہ پہلا موقع ہے کہ اس شق کا استعمال کرتے ہوئے کسی وزیر اعظم کا تقرر کیا گیا ہے۔ یہ بھی پہلی بار ہے کہ مدھیسی برادری کا کوئی شخص نیپال کا وزیر اعظم بنا ہے۔

شاہ، جنہوں نے انتخابات میں حصہ لینے کے لیے کاٹھمنڈو میٹروپولیٹن بلدیہ کے میئر کے عہدے سے استعفیٰ دیا تھا، پہلی بار پارلیمنٹ میں داخل ہونے پر وزیر اعظم بنے۔ انہوں نے جھاپا-5 حلقہ سے ایوان نمائندگان کا انتخاب جیتا، سابق وزیر اعظم کے پی شرما اولی کو تقریباً 50,000 ووٹوں کے فرق سے شکست دی۔

شاہ کی کابینہ نے سوارنم واگلے کو وزیر خزانہ مقرر کیا ہے، اور سودن گرونگ کو وزارت داخلہ سونپی گئی ہے۔ ششیر کھنال کو وزارت خارجہ دی گئی ہے۔ سنیل لمسال کو فزیکل انفراسٹرکچر، ٹرانسپورٹ اور شہری ترقی کی وزارت کی ذمہ داری دی گئی ہے۔

ویراج بھکت شریسٹھا کو توانائی، آبی وسائل اور آبپاشی کی وزارت کا چارج دیا گیا ہے، جب کہ کھڑکراج پوڈیل (گنیش) کو سیاحت کا وزیر مقرر کیا گیا ہے۔ سسمیت پوکھرل کو تعلیم، سائنس اور ٹیکنالوجی اور نوجوانوں اور کھیل کی وزارت کی ذمہ داری دی گئی ہے۔ نشا مہتا صحت اور آبادی کی وزیر بنی ہیں، جبکہ وکرم تملسینا کو مواصلات کا وزیر بنایا گیا ہے۔

اسی طرح پرتیبھا راول کو جنرل ایڈمنسٹریشن کا وزیر، دیپک شاہ کو محنت اور روزگار کا وزیر اور سوویتا گوتم کو قانون کا وزیر مقرر کیا گیا ہے۔ گیتا چودھری کو زراعت اور حیوانات کی ترقی اور جنگلات اور ماحولیات کی ذمہ داری دی گئی ہے، جب کہ سیتا وادی کو خواتین اور بچوں کی وزیر بنا یا گیا ہے۔

---------------

ہندوستان سماچار / عبدالسلام صدیقی