بھوپال، 27 مارچ (ہ س)۔ ہندوستان کی ریاست مدھیہ پردیش کے دارالحکومت بھوپال کے راجا بھوج ہوائی اڈے پر آئندہ 29 مارچ سے سمر سیزن شیڈول نافذ ہو رہا ہے۔ اس سیزن میں بھوپال کو نئے شہروں کی کنیکٹیویٹی کے نام پر صرف نوی ممبئی تک ایک نئی پرواز شروع ہو رہی ہے، جبکہ گوا روٹ پر چلنے والی انڈیگو کی پرواز 29 مارچ سے بند ہو جائے گی۔
راجا بھوج ہوائی اڈے کے ڈائریکٹر رام جی اوستھی نے جمعہ کو معلومات دیتے ہوئے بتایا کہ سمر سیزن شیڈول کے ساتھ بھوپال سے ہوائی کنیکٹیویٹی میں اضافہ ہونے جا رہا ہے۔ نئے شیڈول کے تحت نوی ممبئی اور حیدرآباد کے لیے اضافی پروازیں شروع کی جائیں گی، جس سے مسافروں کو پہلے سے زیادہ متبادل ملیں گے۔ نیا نظام نافذ ہونے کے بعد بھوپال سے کل 36 پروازوں (18 جوڑی) کی آمد و رفت ہونے لگے گی۔
ایئرپورٹ انتظامیہ کے مطابق، ڈائریکٹوریٹ جنرل آف سول ایوی ایشن (ڈی جی سی اے) سے منظوری ملنے کے بعد بھوپال سے نیا سمر سیزن شیڈول نافذ کیا جا رہا ہے۔ نئے شیڈول کے مطابق انڈیگو ایئر لائنز ممبئی اور حیدرآباد کے لیے اضافی پرواز شروع کرے گی۔ اس سے ان دونوں شہروں کے لیے سفر کرنے والے مسافروں کو زیادہ سہولت ملے گی۔
نئے شیڈول کے مطابق بھوپال سے دہلی، ممبئی، نوی ممبئی، بنگلورو، حیدرآباد، پونے، احمد آباد اور رائے پور کے لیے براہِ راست پروازوں کی خدمات دستیاب رہیں گی۔ ان پروازوں کا آپریشن انڈیگو، ایئر انڈیا اور ایئر انڈیا ایکسپریس کے ذریعے کیا جائے گا۔ وہیں، سمر سیزن میں دہلی کے لیے سب سے زیادہ 7 روزانہ پروازوں کا آپریشن ہوگا۔ اس سے مسافروں کو دن کے الگ الگ وقت پر دہلی جانے کا موقع ملے گا۔ وہیں ممبئی کے لیے چار، بنگلورو کے لیے تین اور حیدرآباد کے لیے دو پروازیں دستیاب رہیں گی۔
سمر سیزن میں ایئر انڈیا ایکسپریس بھوپال میں اپنا بیس اسٹیشن شروع کرنے جا رہی ہے۔ کمپنی بنگلورو کے لیے پرواز کی خدمت شروع کرتے ہوئے یہاں سے اپنی سرگرمیاں شروع کرے گی۔ تاہم، گوا جانے والے مسافروں کو سمر سیزن میں پریشانی اٹھانی پڑے گی، کیونکہ 29 مارچ سے بھوپال-گوا کے درمیان چلنے والی انڈیگو کی فلائٹ بند ہو جائے گی۔ ایسے میں مسافروں کو اب کنیکٹنگ فلائٹ لینی ہوگی یا ٹرین سے لمبا سفر کرنا پڑے گا۔
ایئرپورٹ انتظامیہ کا ماننا ہے کہ سمر سیزن میں پروازوں کی تعداد بڑھنے سے بھوپال سے ملک کے اہم شہروں کے درمیان رابطہ مزید مضبوط ہوگا۔ ایئرپورٹ ڈائریکٹر رام جی اوستھی کے مطابق سمر شیڈول اکتوبر تک نافذ رہے گا اور اس دوران ایئر کنیکٹیویٹی میں مزید توسیع کا امکان بھی ہے۔
ہندوستھان سماچار
---------------
ہندوستان سماچار / انظر حسن
