ودھان بھون کے جعلی پاس معاملہ، پانچ ملزمان گرفتارممبئی، 27 مارچ (ہ س)۔ مہاراشٹر کے ممبئی میں ودھان بھون کے بجٹ اجلاس کے دوران جعلی داخلہ پاس فراہم کرنے کے معاملے میں پولیس نے 27 مارچ کو 5 ملزمان کو گرفتار کر لیا ہے، جبکہ اس کیس کی تحقیقات میرین ڈرائیو پولیس اسٹیشن کی ٹیم کر رہی ہے۔پولیس حکام کے مطابق گرفتار ملزمان میں وزارت کے 2 اور ودھان بھون کے 2 ملازمین بھی شامل ہیں۔ تحقیقات کے دوران یہ بات سامنے آئی کہ ملزم دتاتریہ گنجال نے جعلی پاس پر خود کو وزیر اعلیٰ دفتر کا مشیر ظاہر کیا تھا اور اسی بنیاد پر ودھان بھون میں داخلے کی کوشش کی گئی۔اس معاملے میں گرفتار افراد میں دتاتریہ گنجال (53)، چپراسی گنپت بھاؤ جاولے (50)، ناگیش شیواجی پاٹل (42)، کلرک منوج آنند موربلے (40) اور سوپنل رمیش تائڈے (40) شامل ہیں، جبکہ وزارت سے وابستہ مہیش ڈمپلوار اور لوویش شنکر نکاتے فی الحال مفرور ہیں۔ پولیس کے مطابق بجٹ اجلاس کے دوران جعلی پاس کے ذریعے ودھان بھون میں داخل ہونے کی کوشش کے بعد اس معاملے کی چھان بین شروع کی گئی تھی۔ اس سے قبل ودھان بھون میں بم کی دھمکی کے بعد سیکیورٹی اصول سخت کیے گئے تھے۔رکن اسمبلی امول مٹکری نے بھی اس مسئلے کو اٹھاتے ہوئے کہا تھا کہ ودھان بھون کے جعلی پاس 2000 سے 5000 روپے میں فروخت کیے جا رہے ہیں، جس کے بعد وزیر صنعت ادے سامنت نے اس معاملے کی جانچ کے احکامات دیے تھے۔ اسی کارروائی کے تحت میرین ڈرائیو پولیس نے 5 ملزمان کو گرفتار کیا ہے جبکہ مزید 2 افراد کی تلاش جاری ہے۔ہندوستھان سماچار

ہندوستان سماچار / جاوید این اے