امراوتی ممبئی ، 25 مارچ (ہ س)۔ امراوتی ضلع پریشد نے مالی سال 27-2026 کے لیے تقریباً 39.99 کروڑ روپے کا بجٹ پیش کرتے ہوئے دیہی علاقوں کی ترقی کے لیے مختلف شعبوں میں مالی منصوبہ بندی کی ہے۔ یہ بجٹ چیف ایگزیکٹو آفیسر سنجیتا مہاپاترا نے ضلع پریشد کے اجلاس میں پیش کیا، جبکہ اس سے قبل سال 26-2025 کا نظرثانی شدہ بجٹ بھی پیش کیا گیا۔

بجٹ کے مطابق گزشتہ سال کے مقابلے میں زراعت، آبپاشی، صحت، مویشی پروری، پانی کی فراہمی اور خواتین و اطفال کی بہبود کے شعبوں کے لیے مالی وسائل میں اضافہ کیا گیا ہے، تاہم تعلیم اور تعمیرات کے شعبوں میں کمی کی گئی ہے۔

ضلع پریشد کے تحت 14 پنچایت سمیتی اور 841 گرام پنچایتیں آتی ہیں، اور اسی کو مدنظر رکھتے ہوئے محدود آمدنی کے ذرائع جیسے اسٹامپ ڈیوٹی، مقامی و اضافی ٹیکس، سرکاری گرانٹس اور پانی کے محصولات کے ذریعے بجٹ تیار کیا گیا ہے۔

اعداد و شمار کے مطابق گزشتہ مالی سال کا نظرثانی شدہ بجٹ 37.25 کروڑ روپے تھا، جبکہ نئے مالی سال کے لیے اسے بڑھا کر 39.99 کروڑ روپے کیا گیا ہے۔

اجلاس کے دوران چیف اکاؤنٹس و فنانس آفیسر شلپا پوار نے ابتدائی کلمات پیش کیے، جس کے بعد سی ای او نے بجٹ کی تفصیلات رکھی۔ اجلاس میں ایڈیشنل سی ای او ونئے ٹھمکے، ڈپٹی سی ای او شری رام کلکرنی، انجینئر دنیش گائیکواڑ، سنیل جادھو، ملا توڈکر، گیانبا پونڈ، بالاساہیب رائبولے اور ستیش مغل سمیت دیگر افسران شریک رہے۔

محکمہ وار فنڈ کی تقسیم میں سماجی بہبود کو 5.17 کروڑ، پانی فراہمی کو 4.62 کروڑ، تعلیم کو 4.29 کروڑ، تعمیرات کو 4.18 کروڑ، آبپاشی کو 4.02 کروڑ، صحت کو 2.87 کروڑ، خواتین و اطفال کو 2.16 کروڑ، زراعت کو 1.54 کروڑ، مویشی پروری کو 1.47 کروڑ اور معذورین کی بہبود کو 1.45 کروڑ روپے مختص کیے گئے ہیں۔

ہندوستھان سماچار

--------------------

ہندوستان سماچار / جاوید این اے