ممبئی، 25 مارچ (ہ س)۔ ناسک جنسی زیادتی کیس میں ملزم اشوک کھرات کے خلاف ایک اور ایف آئی آر درج ہونے کے بعد معاملہ مزید پیچیدہ ہو گیا ہے، جبکہ تفتیشی ایجنسیاں مختلف پہلوؤں سے جانچ میں مصروف ہیں۔پولیس ذرائع کے مطابق ایک متاثرہ خاتون نے منگل کو سہکار واڑا پولیس اسٹیشن پہنچ کر اپنی شکایت درج کرائی، جس میں اس نے الزام لگایا کہ ملزم نے نشہ آور دوا دے کر اس کے ساتھ زیادتی کی۔ شکایت موصول ہوتے ہی پولیس نے فوری طور پر نیا مقدمہ درج کر لیا۔ اس نئے کیس کے بعد اشوک کھرات کے خلاف درج مقدمات کی تعداد سات ہو گئی ہے۔ اس سے قبل چھ مقدمات پہلے ہی درج کیے جا چکے تھے، جبکہ مزید متاثرین کے سامنے آنے کا بھی امکان ظاہر کیا جا رہا ہے۔پولیس حکام کے مطابق ملزم سے مسلسل پوچھ گچھ کی جا رہی ہے اور تفتیش کا دائرہ وسیع کیا جا رہا ہے، جس میں مبینہ نربلی کے پہلو کو بھی شامل کیا گیا ہے۔ یاد رہے کہ اس کیس کا پہلا مقدمہ 17 مارچ کو درج کیا گیا تھا اور اگلے ہی دن یعنی 18 مارچ کو ملزم کو گرفتار کر لیا گیا تھا۔ تحقیقات کے دوران ملزم کے گھر سے پانچ استعمال شدہ کارتوس برآمد ہونے کے بعد نربلی کے شبہ نے کیس کو مزید سنگین بنا دیا ہے، جس پر پولیس خصوصی توجہ دے رہی ہے۔ہندوستھان سماچار

ہندوستان سماچار / جاوید این اے