سیہور، 22 مارچ (ہ س)۔

مدھیہ پردیش میں گزشتہ چار دنوں تک مختلف علاقوں میں ہوئی بارش اور ژالہ باری کے بعد اتوار کو موسم صاف ہو گیا ہے اور تیز دھوپ نکلنے سے درجہ حرارت بھی بڑھنے لگا ہے۔ محکمہ صحت کی جانب سے بڑھتے ہوئے درجہ حرارت سے صحت پر ہونے والے مضر اثرات سے بچاو کے لیے ایڈوائزری جاری کی گئی ہے۔

سیہور کے سی ایم ایچ او ڈاکٹر سدھیر کمار ڈہریا نے بتایا کہ اس سلسلے میں ضلع کی تمام صحت تنظیموں کے انچارج افسران کو مسلسل نگرانی اور علاج کی ہدایات دی گئی ہیں۔ اس کے ساتھ ہی تمام صحت کارکنوں کی رہنمائی بھی کی جا رہی ہے۔ تمام طبی اداروں کے افسران کو آنے والے مریضوں میں لو کی علامات کی جانچ کرنے، مناسب انتظام کرنے، ٹھنڈے پینے کے پانی کی فراہمی اور وارڈ میں ٹھنڈک کے لیے پنکھوں کا انتظام کرنے کی بھی ہدایت دی گئی ہے۔

سی ایم ایچ او ڈاکٹر ڈہریا نے بتایا کہ تیز دھوپ اور زیادہ دیر تک باہر رہنا لو لگنے کی بڑی وجہ ہوتی ہے۔ اس سے جسم میں پانی کی کمی ہو جاتی ہے جس سے الیکٹرولائٹ کا توازن بگڑ جاتا ہے۔ انہوں نے بتایا کہ تمام طبی اداروں میں ایک ’ہیٹ اسٹروک مینجمنٹ یونٹ‘ بنایا جا رہا ہے اور گرمی سے متعلق بیماریوں سے بچاو کے لیے ضروری ادویات فراہم کی جا رہی ہیں۔ اس کے ساتھ ہی تمام مراکز میں او آر ایس کارنر بنائے جا رہے ہیں۔ حساس گروہوں جیسے حاملہ خواتین، بچوں اور بزرگوں کے لیے بھی اسپتالوں میں مناسب انتظامات کی ہدایات جاری کی گئی ہیں۔

ڈاکٹر سدھیر ڈہریا نے بتایا کہ گرمی کے دوران لو سے بچاو کے لیے وقفے وقفے سے پانی پیتے رہیں۔ دھوپ میں باہر نکلتے وقت جسم کو سوتی کپڑوں سے ڈھانپ کر رکھیں اور اخبارات و سوشل میڈیا پر آنے والی صحت سے متعلق خبروں کا مشاہدہ کریں۔

انہوں نے بتایا کہ گرمی کے دوران لو سے بچاو کے لیے دوپہر 12 بجے سے 3 بجے کے درمیان دھوپ میں نہ نکلیں، اس وقت لو لگنے کا امکان زیادہ ہوتا ہے۔ شراب، چائے، کافی وغیرہ کا زیادہ استعمال نہ کریں۔ کوئی بھی سخت محنت کا کام کرتے وقت وافر مقدار میں پانی پیتے رہیں اور ڈی ہائیڈریشن سے بچیں۔ باسی کھانے کا استعمال نہ کریں۔ زیادہ بھیڑ بھاڑ والی جگہوں پر جانے سے گریز کریں۔ اس کے ساتھ ہی لو کی علامات ظاہر ہونے پر اپنے قریبی مراکزِ صحت سے رابطہ کریں۔

ہندوستھان سماچار

---------------

ہندوستان سماچار / انظر حسن