نئی دہلی، 22 مارچ (ہ س)۔ دہلی پولیس کی کرائم برانچ کے انسداد انسانی اسمگلنگ یونٹ (اے ایچ ٹی یو) نے دو الگ الگ معاملات میں لاپتہ/ اغوا شدہ نابالغ لڑکیوں کو کامیابی کے ساتھ بازیاب کرایا ہے اور انہیں ان کے خاندانوں سے ملایا ہے۔ دونوں واقعات میں پولیس کافی عرصے سے تلاشی لے رہی تھی۔
کرائم برانچ کے ڈپٹی کمشنر آف پولیس (ڈی سی پی) پنکج کمار کے مطابق، پہلا معاملہ کنجھاوالا تھانے کے علاقے سے تعلق رکھتا ہے، جہاں ایک 17 سالہ نابالغ لڑکی 26 دسمبر 2023 سے لاپتہ تھی۔ اس سلسلے میں آئی پی سی کی دفعہ 363 کے تحت مقدمہ درج کیا گیا تھا۔ معاملے کی سنگینی کو دیکھتے ہوئے اے ایچ ٹی یو ٹیم نے تحقیقات کا آغاز کیا۔ انسپکٹر مکیش کمار کی قیادت میں اے ایس آئی اجے کمار جھا اور خاتون ہیڈ کانسٹیبل مونیکا پر مشتمل ایک ٹیم نے تکنیکی نگرانی اور مقامی انٹیلی جنس کی بنیاد پر کارروائی کرتے ہوئے شیو وہار علاقے سے لڑکی کو بچایا۔
پوچھ گچھ کے دوران یہ بات سامنے آئی کہ لڑکی اپنے نابینا والدین کے ساتھ جھگڑے کے بعد گھر چھوڑ کر الور (راجستھان) چلی گئی تھی اور حال ہی میں دہلی واپس آئی تھی۔ اسے فی الحال مزید قانونی کارروائی کے لیے تھانہ کنجھا والا کے حوالے کر دیا گیا ہے۔
دوسرا معاملہ بھلسوا ڈیری پولیس اسٹیشن کے دائرہ اختیار میں آتا ہے، جہاں ایک اور نابالغ لڑکی 28 جنوری 2024 سے لاپتہ تھی۔ اس معاملے میں بھی آئی پی سی کی دفعہ 363 کے تحت مقدمہ درج کیا گیا تھا۔ تکنیکی اور دستی تفتیشی دونوں طریقوں پر مشتمل مسلسل کوششوں کے ذریعے، کرائم برانچ کی ٹیم نے لڑکی کو سنت نگر کے مرکزی بازار علاقہ سے ڈھونڈ نکالا اور بچایا۔
پولیس کی تحقیقات سے پتہ چلا کہ لڑکی کسی کو بتائے بغیر گھر سے چلی گئی تھی اور ورنداون چلی گئی تھی، جہاں وہ ایک آشرم میں مقیم تھی۔ اس کے بعد وہ دہلی واپس آگئی اور قانونی بالغ ہونے کے بعد شادی کر لی۔ پولیس نے اسے بحفاظت تلاش کرکے بچالیا، بعد میں اسے بھلسوا ڈیری پولیس اسٹیشن کے حوالے کردیا۔
پولیس کا کہنا ہے کہ فی الحال دونوں معاملات میں ضروری قانونی کارروائیاں مکمل کی جا رہی ہیں، اور مزید کارروائی جاری ہے۔
---------------
ہندوستان سماچار / عبدالسلام صدیقی
